УВЕР ЙОГЫН

17 октябрь – Ачан кечыже

Эртыше рушарнян Ачан кечыжым икымше гана палемдышна. Тудым Россий Федераций президент Владимир Путинын указше дене илышыш пуртымо да ий еда октябрьыште кумшо рушарнян палемдаш ыштыме.

Ушештарена, ача южо илыш ситуацийыште пенсий да социальный льгото-влак дене ава семынак тичмашын пайдаланен кертеш.

Ава капитал

Икымше (судын эргылыкеш але ӱдырлыкеш налме нерген пунчалже 2020 ий 1 январь гыч вийыш пурен гын) але кокымшо (судын эргылыкеш але ӱдырлыкеш налме нерген пунчалже 2007 ий 1 январь гыч вийыш пурен гын) йочан закон дене пеҥгыдемдыме улыжат-укежат ик еҥже улмо годым пӧръеҥ ава капиталым налаш праван. Тыгак аван колымыжо але ӱдырамашым аван праваж деч посна кодымо годым ава капитал дене пайдаланыме права ачалан кусна.

Ончымылан – окса

18 ияш марте ийготан инвалид йочам але шочынак I группо инвалидым ончышо ача пашам ыштен кертше гражданинлан шотлалтеш, но пашам огеш ыште, а икшывым онча гын, тылзе еда 10 тӱжем теҥге кугытан выплатым налын кертеш. Инвалид йочам ончымо жап страховой огыл пагытын стажышкыже пурталтеш да кажне ийлан 1,8 пенсий коэффициент палемдалтеш.

Жап деч ончыч

Шочынак инвалидым кандаш ийым темымыж марте ончышо ача пенсийыш жап деч ончыч лекташ праван. 20 ий деч шагал огыл стажше уло, да пенсийыш жап деч ончыч лектын кертме права дене ава пайдаланен огыл гын, пӧръеҥ пенсийыш 55 ияшак лектын кертеш.

Ешарен тӱлат

Пенсионер ачан иждивенийыштыже пашам ыштен кертдыме йоча (ийготыш шудымо икшыве але очный формо дене тунемше 23 ияш марте студент) уло, да тиде права дене ава пайдаланен огыл гын, пӧръеҥлан кугемдыме пенсийым палемдышаш улыт. 2021 ийыште пашам ыштен кертдыме кажне йочалан 2014,83 теҥгем ешарен тӱлат.

Шкет ачалан полыш

Изи доходан ешлан полшымо у мере – 8 гыч 16 ияш марте йочан шкет еҥлан тылзе еда тӱлыман пособийым – ава веле огыл, ачат налын кертеш.  Тыгай выплатым йочам шкетын ончышо ача-ава-влаклан ешысе ик еҥлан шотлымаште 10184 теҥге деч шагал доходым налме годым палемдат.

Жап ок йом

Россий законодательстве почеш 1,5 ияш марте йочам ончымо шотышто отпускыш ава веле огыл, ачат каен кертеш. Тиде жап страховой стажыш пурталтеш, тичмаш ийлан 1,8 пенсий коэффициент палемдалтеш.

Социальный полышым налын кертме нерген тичмаш уверым Россий Пенсий фондын сайтыштыже муаш лиеш.

Опубликовать в Одноклассники

Добавить комментарий