САМЫРЫК ТУКЫМ

16 апрель – йӱкын кечыже

Йолташ-влак, а те паледа, йӱкын шке пайремже уло. Эн ончыч тудым 1999 ийыште Бразилийыште палемденыт. Кызыт гын тудо тӱнямбал кӱкшытан кечыш савырнен.

Икмыняр профессийыште тыршыше-влак йӱклан тӱткылыкым поснак ойырат.  Мом тидын нерген самырык специалист-влак шонат – айста пален налына.

Анна Акошкина, тӱвыра пашаеҥ:

Тӱвыра пашаеҥ-влак кажне кечын калык дене вашкылым ыштат. Йоча, пайремыш толшо кугыеҥ, пырля пашам ыштыше йолташ –  кажныж дене мутланен моштыман. Мутлан, самырык-влак дене ик семын гын, илалше дене йӧршын вес семын кутырыман. Йӱк гоч ме кӧ ончылнына шогымым пален, тудын койышыжым, кумылжым умылен кертына. 

Мый  «Мечта» Звенигово тӱвыра пӧрт пеленысе «Аннабель» йоча модо-театрын вуйлатышыже улам. Тунемшем-шамыч дене йоча гай кояаш тыршем, йӱкемын йоҥгымыжым эскерем. Кӱлеш годым ласканрак ойлем, южгунам пеҥгыдынрак каласен колтем.

 

Надежда Назарова, актрисе:

– Чын шындыме йӱк, дикций – актёрын тӱҥ паша инструментше. Сцене гыч ончаш толшылан чыла сайын шоктышаш. Курчак театрыште тидлан поснак тӱткылыкм ойырыман. Вет шарча шеҥгеч йӱк начарракын йоҥгалтеш. Садлан йӱкын ойлыман. Ты годым роль нергенат мондыман огыл.

Шуко актёр спектакль деч ончыч умшаштым, йылмыштым лывыртат. Тидланже пеш шуко йӧн уло. Иктыже – писылудыш. Тудым лудмо годым ончыч мутышто кажне буквам раш, йоҥгыдын ойлыман. Писемме годым мут-влак ынышт йом манын эскерыман.

 

 

 Надежда Ильина, врач-педиатр, мурызо:

– Мый йоча врач улам. Пашаштем йӱк моткоч кугу рольым модеш. Йоча дене мутланымеке, йӱкым ныжылгыракым, але йочан гайым ыштен колтет

 гын, эмганыше изи айдемын кумылжо тыйын велке савырна. Йоча шижеш: тудым умылат, тудлан осалым огыт шоно. Садланак писынрак тӧрлана, кӱштымӧ ойым шукта. Эмымат тамлен йӱэш.

Йӱк дене «модын» моштыман. Кеч-могай мутланымаште тудым чын шындаш тыршыман. Вет тудо весылан

 мемнан ойнам почын пуа. Садлан тӱткырак лийман. Тудын гоч айдеме нерген шуко мом пален налаш лиеш: кумылжым, тазалыкшым, шонымыжым.

 Артист семынат, врач семынат йӱкым аралыман да вияҥдыман. Пеҥгыде йӱкан специалистым утларак колыштыт. Тиде шонымаш дене мый тӱрлӧ упражнений дене пайдаланем. Но эн тӱҥжӧ – мутланыме годым чын шӱлаш. Тиде дикцийлан пеш пайдале.

О.МОШКИНА

Опубликовать в Одноклассники

Добавить комментарий