АКЦИЙ КОНКУРСЫ

13 ӱдыр — 13 «сий»

«Ӱдырсий» конкурс тений визымше гана лийын да регион кокласе кӱкшытыштӧ эртен. Неле чер эпидемийлан кӧра тудым организатор-влак В.М.Васильев лӱмеш Йылмым, литературым да историйым научно шымлыше марий институтын актовый залыштыже офлайн ден онлайн йӧн дене эртареныт.

Шке жапыштыже ты конкурслан тӱҥалтышым «Саскавий» марий ӱдырамаш ушем ыштен. Марий Элын Тӱвыра, савыктыш да калык паша шотышто министерствыжын полшымыж дене республикысе Марий тӱвыра рӱдер дене пырля ик гана веле огыл эртареныт. А тений мероприятийым вес кӱкшытыш лукташ да географийжымат кумдаҥдаш Российысе марий-влакын калыкле-тӱвыра автономийышт полшен. Ты организаций тений национальный шӱлышан мероприятий-влакым эртараш Калык-влакын пашашт шотышто федеральный агентствын грантшым сеҥен налын. Ик тыгай мероприятийже лачшымак «Ӱдырсий» конкурс палемдалтын улмаш.

Ӱдырсий пайрем – марий ӱдыръеҥын мастарлыкшым, йол ӱмбак пеҥгыдын шогалме, ончыкылык илышлан ямде улмыжым ончыктымо йӱла жап. Тудым ончыч, пасу пашам пытарымеке, икымше лум толмеке, шыжа ден кылме тылзылаште эртареныт. Ныл ий жапыште ӱдыръеҥын кид-йол мастарлыкшым, калык йӱлам палымыжым аклыше пайрем сынан конкурс 2016 ийыште Кужэҥер район гыч Полина Савельевалан, 2017 ийыште Курыкмарий район гыч Валентина Петровалан, 2018 ийыште Морко район гыч Ирина Зориналан, 2019 ийыште Волжский район гыч Татьяна Яковлевалан тӱҥ сеҥымашым конден. А тений гран-прим Озаҥ ола гыч Алена Токташова сеҥен налын. Самырык ӱдыр Татарстан Келшымаш пӧрт пеленысе марий йылмым тунемме рушарня школышто туныкта, мер пашаште чолгалыкым ончыкта, «Лай мардеж» ансамбльыште мура да кушта. А конкурслан ыштыме вургемже гын, марий манмыла, шинчам йымыктарен.

Ӱдыр-влакын мастарлыкыштым аклаш моткоч пагалыме еҥ-влакым ӱжыныт. Нунын коклаште профессор, культурологий доктор Г.Шкалина, Марий кугыжаныш филармоний директорын алмаштышыже А.Речкин, Марий Элын калык поэтше Г.Сабанцев, филармонийыштак ыштыше Марий Элын сулло артистше А.Саутова лийыныт.

Конкурсыш тӱрлӧ регион гыч 18-25 ияш 13 ӱдыр ушнен. Кажныже «Мый марий ӱдыр улам» видеопрезентацийым колтен, тыгак видео гоч «этномодым» да шке кундемысе ойыртемалтше марий пайрем йӱлам ончыктен. Жюри

моторлыкыштым веле огыл, мастарлыкыштым, уш-акыл пӱсылыкыштым, шкем кучен моштымыштым, марий йӱлам палымыштым аклен.

Конкурс жапыште «Марийцы России» ФНКА-н ВКонтакте соцкылысе лаштыкыштыже интернет-йӱклымаш эртен. «Интернет марий ӱдыр» лӱмым Пошкырт кундем Калтаса район гыч Ольга Валтиева сеҥен налын – 3751 лайкым поген. Икымше вер дене кок ӱдыр палемдалтыныт: Волжский район гыч Диана Алексеева ден Санкт-Петербург гыч Екатерина Шабдарова. Катя кугу олаште ила гынат, марий шӱлышан улмыжлан ӧраш гына кодеш. Марла кутыра веле огыл, сайын мура да кушта, ӱдыр рвезе-влакым ушышо «Югорно» ансамбльым вуйлата, Санкт-Петербургысо марий-влакын «Ший корно» калыкле-тӱвыра автономийыштын чолга еҥже. Конкурслан вургемымат шкеак урген да тӱрлен, вуйчиемымат келыштарен.

Кокымшо верыш Виче кундемысе Пыжанью районысо Вӱлэнер гыч Наталья Чиванова лектын. Кумшо вер тыгак кок еҥлан шыргыжалын: Москва ола гыч Татьяна Рыбакова ден Курыкмарий район гыч Алина Мамутиналан. Моло участницыланат посна номинацийыште сай пӧлекым кучыктеныт. Кужэҥер район гыч Анастасия Топаева «Семалче» номинацийыште ойыртемалтын, Пошкырт велысе Калтаса район гыч Ирина Шаймарданова «Шымалче», Параньга район гыч Ирина Глушкова «Кумыл налше», Морко район гыч Анастасия Михайлова «Тыматле», Одо кундемысе Грак район гыч Ирина Красильникова «Пампалче», Морко районысо Шале тӱвыра пӧрт вуйлатыше Анна Смирнова «Усталче», Пошкырт кундемысе Калтаса район гыч Ольга Валтиева «Калык йӱлам палыше» семын палемдалтыныт.

Эпидемийлан кӧра чыла участницыжак конкурсым иктешлымашке толын кертын огыл гынат, пайрем шӱлышым нимоат волтен огыл. Эшежым организатор-влак моткоч сай пӧлекым ямдыленыт, спонсор-шамычын полшымыштлан кӧра тӱрлӧ акан сертификатым кучыктеныт.

С.НОСОВА

М.Скобелевын фотожо

Опубликовать в Одноклассники

Добавить комментарий