2035 ий марте Марий Элыште туризм отрасльыште 12 проектым илышыш шыҥдарат.
Кодшо кечылаште Россий правительстве пеленысе Туризмым вияҥдыме шотышто комиссийын заседанийыштыже 2024-2025 ийласе туризм сезонын регионласе лектышыжым иктешленыт да у пагытлан ямдылалтме планым рашемденыт.
Регион вуйлатыше Юрий Зайцевын палемдымыж почеш, телым гына Марий Элыш 150 тӱжем турист толын каен, 77 тӱжемже лачшымак Йошкар- Олаште лийын.
Марий Элыште отрасльым вияҥдыме мастер-план ышталтын. Ты план почеш 2035 ий марте поснак ойыртемалтше (флагманский) 12 проектым, пеш писын шукталтше 32 да кужу жап шуйнышо 43 программым илышыш шыҥдараш палемдыме. Тӱрыс пашам шуктымылан кӧра республикысе туризмыш кажне ийын ешарен тӱлымӧ валовый ак 4,4 миллиард теҥгеш шушаш, проект-влакым шуктымо деч налог кугыт 2,6 миллиард теҥге лийшаш, 4,7 тӱжем у паша вер лекшаш, уна-влакын илаш кодмо кокла кечышт 5 кече наре лийшаш, оласе средан качестве индексше 10 процентлан саемшаш.
Туризмым вияҥден колташ манынак, республикыште транспорт системе уэмдалтеш. Аэропорт уэмден чоҥалтеш. 2023 ийыште Козьмодемьянскыште причалым пашаш колтымо. Тений кеҥежым Юринысе Шереметьев замок дене, вес ийын Кокшайскыште причал-влакым чоҥаш тӱҥалына», – палемден Юрий Зайцев.
Республикыште ялысе туризмат вияҥеш. Реестрыш аграрный направленийымат пуртымо. Кок проект Россий Ялозанлык министерствын грантшым налын: тиде «ЗаАзяково» экопарк ден «Мари Отар».
Заседанийым вӱдышӧ, РФ правительстве председательын алмаштышыже Дмитрий Чернышенкон палемдымыж почеш, 2021 ийыште стартым налше «Туризм да унам вашлийме индустрий» проект ты отрасльлан вияҥаш полшымо системыжымак вашталтен. 2024 ийлан мом палемдымым чылажат шуктымо. Турист семын кудалыштше-влакын чотышт 90 миллионыш шуын, тидыже, проект тӱҥалме пагыт гыч налаш гын, 37 процентлан шукырак. Санденак тудым 2030 ий марте шуят.
Марий Эл вуйлатышын пресс-службыжын уверже негызеш Светлана Носова ямдылен.
Снимкыште: Юрино причалын проектше
