Республикысе Гигиене да эпидемиологий рӱдерын, СПИД-рӱдерын лабораторийлаштышт коронавируслан тергаш тӱҥалме жап гыч 17 апрель марте чылаже 10365 шымлымашым эртарыме.
Роспотребнадзорын Марий Элысе виктемжын палдарымыж гыч, таче, 17 апрельыште, у коронавирус инфекций дене авалталтме эше 32 у случайым официально регистрироватлыме. Тыге, республикыштына тиде кече марте COVID-2019 дене чылаже 179 еҥ черланен, 34 пациент паремын да икте колен.
Пытартыш суткаште рашемдыме чыла случай тымарте черланыше-влак дене кылым кучымо дене кылдалтын.
860 еҥым, ты шотыштак у коронавирус инфекций дене авалталтын кертше-влак дене кылым кучышо 823 гражданым, медицине велым эскерат. Учёт гыч 2706 еҥым, ты шотыштак 53 йот гражданым, кораҥдыме.
М.ИВАНОВА
