Россий Федераций Науко да кӱшыл образований министр Валерий Фальков россий вуз-влакын ректорышт дене COVID-19 шарлыме ваштареш профилактике условийыште у тунемме ийлан ямдылалтме йодыш дене кылдалтше онлайн-совещанийым эртарен.
Вашлиймаш годым министр университетлаш пуртымо у правил-влак дене палдарен. Эн ончычак йодмаш тыгай: студент-влакат, преподаватель-шамычат маскым чиен коштшаш улыт, лекций годым гына тудым кудашаш лиеш.
Валерий Фальковын палемдымыж почеш, тиде йодмаш обязательный лийшаш. Но студентын але туныктышын вируслан антител улмым пеҥгыдемдыше справке уло гын, тудо тунемме верыште маске деч посна коштын кертеш. Чер пижме деч аралыме средствам кажне вуз шке кӱшешыже налшаш.
Пеҥгыде вес йодмаш – тунемме верыште шинчымашым погышо да туныктышо, тыгак пашаеҥ-влакын капкыл температурыштым кажне кечын висыман. Тыгак кажне аудиторийыште южым дезифинцироватлыше приборым вераҥдышаш улыт.
Совещанийыште вес ола да йот эл гыч тунемаш толшо-влак шотыштат йодышым тарватыме. Мутлан, йот студент-шамыч вузын омсажым почмышт деч ончыч 14 кечаш карантиным эртышаш, вируслан тестым сдатлышаш улыт. Тидын деч вара гына нуно тунемаш тӱҥалын кертыт. Кӧ тиде але тудо элыш толын огеш керт, тудо онлайн йӧн дене шинчымашым поген кертеш. «Йошкар зоно» гыч лекше студент-влаклан поснак кугу тӱткыш ойыралтшаш, нуным вузыш да тӱшкагудыш вируслан тестым сдатлымекышт гына пуртыман.
2020-2021 тунемме идалык 1 сентябрьынак тӱҥалеш мо? Тиде йодышлан министр каласен: «Ты шотышто кажне вуз шке семынже решатла. Тунемме процессым 2 тылзылан шеҥгеке шӱкалын кертыт, но Российысе кӱшыл образованийым пуышо чыла вуз гыч 92 процентше у тунемме идалыкым 1 сентябрь гычак тӱҥалаш ямде улыт», – каласен Валерий Фальков.
Тиде кечылаштак Россий Федераций Науко да кӱшыл министерстве 2020-2021 тунемме ийлан бюджет вер-влакын чотыштым палемден – 576,4 тӱжем, тышеч 33,7 тӱжемжым бакалавриат да специалитет программыла дене тунемше-влаклан ойырымо. Каласыман, шукерте огыл россий президент Владимир Путин элыштына кӱшыл образованийым налме шотышто тыге каласен: «2021 ий гыч кажне ийын ме бюджет верлам шукемдаш да нуным регионласе вуз-шамычлан пуаш тӱҥалына. Эн ончычак – жаплан келшыше самырык специалист-влаклан чӱдӧ кундемлаш».
Валерий Фальковын увертарымыж почеш, тений эн шуко бюджет вер Новгород, Белгород, Томск, Ростов, Саратов областьласе, тыгак Еврей АО-со, Марий Элысе да Татарстанысе университетлаште лийшаш.
«2021 ийыште чумыр налмаште эл мучко бюджет вер 9 процентлан шукемеш. Тачысе экономикылан IT-технологий сферылан ятыр пашаеҥ кӱлеш, кокымшо верыште – туныктышо-влак. Сандене лач нине профессийлан туныктен лукташ эн шуко бюджет вер ойыралтеш», – каласен министр.
Г.КОЖЕВНИКОВА
