АКЦИЙ КОНКУРСЫ

Эн шерге мут – эн шерге айдемылан!

Аван кечыже вашеш «Саскавий» марий ӱдырамаш ушем ден Марий тӱвыра рӱдер «Авалан серыш» лӱман конкурсым увертареныт ыле. Теҥгече, 30 ноябрьыште, тудым Марий самырык театрын сценыштыже иктешлышт.

Коронавирус инфекций шарлыме лӱдыкшылан кӧра мероприятий онлайн йӧн дене эртыш. Сеҥыше-влакымат, чылаштым огыл гынат, тӱҥ шотышто тыгак саламлышт.

Мероприятий Светлана Осипован ава нерген йоҥгалтарыме чонеш логалше мурыж дене тӱҥале. А умбакыже конкурсышто ийгот шот дене тӱрлӧ тӱшкаште сеҥыше-влак дене палдарышт. Вигак палемден кодена: конкурсыш авалан серышым марла (олык, курыкмарла) да рушла возен колташ йӧн пуалтын. Тыге жюрилан аклаш чылаже 87 паша пурен.

9 гыч 12 ияш марте-влак коклаште 1-ше вер дене Дарья Юрьева (Национальный президент школ-интернат, 6-шо класс) палемдалте. Курыкмарла возышо-влак коклаште Павел Саличкин (Виловат кыдалаш школ, 2-шо класс) сеҥен. Аважлан серышым руш йылме дене эн сайын Екатерина Веренич (Медведево район Руэм кыдалаш школ, 4-ше класс) возен.

13-16 ияш-влак коклаште марла эн ойыртемалтшын Юлия Горохова (Кужэҥер район Коҥганур школ, 10-шо класс) возен. Рушла серыме паша-влак кокла гыч 1-ше вер дене Елена Павлова (Волжский район Пӧтъял кыдалаш школ, 9-ше класс) палемдалте.

Мо оҥайже, 17 гыч 20 ияш ийготан-влак деч конкурсыш ик серышат пурен огыл.

21 да тылеч кугырак ийготан-влак коклаште Наталья Михайлован руш йылме дене возымо пашажым палемдышт. А аваштлан серышым марла возышо да сеҥышыш лекше еҥ-влакым кумыньыштымат каласенак кодымо шуэш. Молан манаш гын кажныштымат шукынжо сайын палат. 1-ше верым «МЭТР» ГАУК-ын корреспондентше Вера Горохова сеҥен нале. Серышыж гыч ик ужашым тудо шкежак сцене гыч лудын пуыш. Чынжымак, чот чонеш логалшын возен. 2-шо верыш Вера Гордеева (Армякова) лекте. Кумшо вер дене эше ик коллегына – «Ямде лий» газетын пашаеҥже Христина Александрова палемдалте. Коктынжо иктешлымашке толыныт ыле, сандене пӧлекым да дипломым вигак шканыштак кучыктышт.

А мероприятий ава нергенак эше ик сылне муро дене мучашлалте. Тудым Зоя Берникова йоҥгалтарыш.

Конкурсышто сеҥыше-влакым меат уло кумылын саламлена! Тыгак, йӧн дене пайдаланен, эртыше Аван кечыж дене ава-влаклан эше ик гана

поро мутым каласыме шуэш: шӱм-шокшыдам шочшыда-влаклан нимучашдымын пӧлеклымыланда тау! Вет ава, чынжымак, кече гае…

Любовь КАМАЛЕТДИНОВА

Опубликовать в Одноклассники

Добавить комментарий