18 июль — Кугыжаныш пожарный службын ышталтме кечыже
Тений июль гыч Россий МЧС-ын Марий Элысе Тӱҥ управленийыштыже пожар ваштареш кучедалше федеральный службын подразделенийжын чотшым шукемдаш тӱҥалыныт.
Тидын шотышто приказат лийын. Пожарно-утарыше частьлаште 95 у должностьым пуртат. Нине специалист-влак Йошкар-Оласе да республикысе районласе подразделенийлаште пашам ышташ тӱҥалыт. Тидын нерген Россий МЧС-ын Марий Элысе управленийжым вуйлатыше генерал-майор Александр Малкин шукерте огыл журналист-влак дене вашлиймыж годым увертарен.
Вакантный верлаш тыглай граждан-шамычат толын кертыт. Поснак пожарный автомобильым виктарыше-влак кӱлыт. Тиде должностьыш армийыште лийше да пенгыде тазалыкан, физически виян 40 ияш марте пӧръеҥ-влак кӱлыт. С категориян водитель-влакын стажышт 5 ий деч шагал огыл лийшаш. Штатым кугемдыме пашам октябрь марте мучашлышаш улыт.
Тений июльын пытартыш арняштыже гына Марий Элыште 31 пожар лийын. Тышеч индешыжлан тӱҥалаш кукшо шудо да шӱкшак амалым ыштеныт. Каласен кодыман, кызыт ынде эсогыл тополь мамык гыч ылыжмымат пожарланак шотлат. Тидын нерген Россий МЧС-ын Тӱҥ управленийжын Надзор да профилактике паша управленийжын начальникше, элкӧргӧ службын полковникше Сергей Петров палдарен. «Йошкар агытан» эн шуко гана Йошкар-Олаште озаланен. Вара Звенигово район, Волжск ола ден Медведево район каят. А идалык гыч тӱҥналын тачысе кече марте чылаже 1231 пожар лийын. Тушто 20 еҥ колен, 16 — сусырген. Материальный эҥгекын кугытшо 75 миллион теҥгеш шуын. Тӱҥ шотышто еҥ-влакын тӱткыдылымыкыштлан кӧра тул ылыжеш: йоча-влак оссалланат, пӧръеҥ-влак йӱшывуя тамакым шупшыт, электрооборудований дене пайдаланыме годым правилым огыт шукто… Кеч пожар ваштареш кучедалше специалист-влак калыкыште профилактик пашам сайын эртарат. Мутлан, «Жилище» операцийымак налаш. Сурт, пачер еда еҥ-влаклан умылтарен коштыт. 40 тӱжем наре еҥым авалтеныт. Тыгак икшыве-шамыч коклаштат тыгай паша сайын вораҥеш. Образовательный учрежденийлаш нуно чӱчкыдын лектедат.
Сергей Порфирьевичын ойлымыж почеш, пытартыш жапыште МЧС-ын специалистше семын пачер, сурт еда противопожарный оборудованийым шергын ужален коштшо-влак лектыныт. Тидын нерген Йошкар-Олаште илыше-влак эсогыл соцсетьлаште увертарат. Ты шотышто тудо журналист-влакым тӱрлӧ изданий гоч лудшо-шамычлан шижтараш йодо: кугыжаныш пожар надзор службын пашаеҥже-влак граждан-шамычлан тӱлыман услугым огыт пу да пожар ваштареш кучедалаш полшышо оборудованийым огыт ужале. Пачерыш толшо еҥ тыланда тыгай оборудованийым темла гын, тудын деч служебный удостоверенийжым йодшаш улыда. Эшежым управленийын специалистше-влак Россий МЧС-ын формыжым чийышаш улыт да пеленышт оҥыш пижыктыме «Государственный пожарный надзор» жетонышт лийшаш. А пожарный оборудованийым специализироватлыме кевытлаште моткоч шулдын налаш лиеш. Кеч тул ылыжмым шижтарыше пачерыш вераҥдыме извещательжым пожарный-влак обязательно вераҥдаш огытат йод. Но тудо лиеш гын, тул ылыжмым пеш писын шижаш да кугу туткар деч утлаш лиеш.
С.Носова.
