Туныктышын могай лийшашыже шукыж годым пашаште икымше ошкылым ыштыме гычак коеш. Теве Национальный президент школ-интернатыште эртыше «Педагогический дебют -2017» конкурсыш толшо самырык туныктышо, воспитатель, психолог-шамыч мастарлыкыштым тӱналтыштак ончыктеныт. Нуно туныктымо пашаште, илышыш у шонымашым пуртымышт дене ойыртемалтыныт.
Конкурс кок этап дене эртен. Тений заочный этапыште 34 самырык туныктышо, воспитатель, психолог ден педагог-наставник-влак вийыштым тергеныт. Нуно «Мыйын тиде сайын лектеш» лӱман презентацийым возеныт. Тыште педагог-влак шке паша опытышт дене палдареныт.
Кокымшо (очный) этапыште туныктышо-шамыч педагогический проектышт дене палдареныт да почылтмо урокым ямдыленыт. Чыла финалист шкенжым сай могырым ончыктен, но жюри нунын коклаште сеҥышым палемден кодыде кертын огыл.
«Самырык туныктышо» номинацийыште лауреат лӱмым Волжск оласе 5-ше №-ан школышто англичан йылмым туныктышо Евгения Александрова налын. «Самырык воспитатель» номинацийыште Звенигово оласе «Светлячок» йочасадын туныктышо-логопедше Надежда Александрова сеҥышыш лектын. «Педагог-наставник» номинацийыште Волжский экологий рӱдер директорын туныктымо паша шотышто алмаштышыже Екатерина Буркова икымше лийын.
Туныктышо-влакым Марий Элын Образований да науко министрже Н.Адамова, ПГТУ-н ректоржо В.Шебашев, республикын моло ведомствылажым вуйлатыше-влак саламленыт, ятыр пӧлекым кучыктеныт. Нунын лӱмеш ятыр поро мут йоҥгалтын.
— Ты конкурс самырык туныктышо-шамычлан кугу шӱкалтышым ышта манын ӱшанем. Молан манаш гын вес туныктышо-шамычын пашаштым ужын, тидым варажым уроклаштышт кучылт кертыт. Конкурс мылам неле огылла чучын. Шке классем лийын огыл гынат, почылтмо урокышто лийше йоча-шамыч дене кылым вигак муынам.
Школышто кокымшо ий гына ыштем, но мылам тиде сомыл келша. Йоча-влак вийым пуат, умбакыже кушкаш полшат, иктаж уым, оҥайым шонен лукташ таратат. Кокымшо классым туныктем. Нуно мыйым «авай» манын колтат, ӧндалыт. Тыгодым кумылемат тодылтеш. Санденак икшыве-шамыч дене пашам ышташ моткоч келша, — каласыш Медведево поселкысо 2-шо №-ан школышто тӱҥалтыш класслаште туныктышо Аида Бирюкова.
Л.Шабдарова.
М.Скобелевын фотожо.
