17 июньышто Куяр поселко воктене курыкыш куржталме дене Российын чемпионатше, Марий Элын открытый чемпионатше ден первенствыже, ветеран-влак коклаште Россий Гран-прин IX этапше эртен.
Таҥасымашке элнан 16 регионжо гыч 180 утла спортсмен чумырген. Трассе моткоч неле лийын. Куржталше-влаклан кужу жап кӱкшӧ верыш кӱзаш, тура курык гыч волаш кӱлын.
Абсолютный чемпион лӱмым Башкортостанысе Уфа ола гыч 23 ияш Руслан Фаттахов сеҥен налын. Куржталаш йӧратыше-влакын «Марий Эл» клубышт (вуйлатыше В.Кузнецов) общий командный зачетышто икымше верым налын.
Сеҥыше ден призер-шамычлан куштылго атлетике дене Всероссийский федерацийын курыкыш куржталме дене комитетшын председательже Б.Вязнер ден Марий Элын икымше президентше В.Зотин грамотым, медальым, дипломым кучыктеныт.
Ты вид дене Россий чемпионатын вес этапше Курыкмарий район Шӹндырйӓлыште 23 июльышто Аламнер курыкышто эрта.
Снимкыште: Марий Элын командыже.
Л.ШАБДАРОВА.
В.Кузнецовын фотожо.
