Мут — делегатлан
Раиса Попова, Пермь оласе Марий тӱвыра рӱдер вуйлатыше, Пермь крайысе губернатор пеленсе национальный йодыш шотышто координационный советын еҥже:
— Эн тӱҥ темлымаш — Марий Элыште веле огыл, марий-влакын тӱшкан илыме кундемлаштат шочмо йылмым тунемаш йӧным ыштыман. А тидлан кажне тунемшын учебникше да туныктышо-влакын методический пособийышт лийшаш. У программе шотыштат тыгаяк йодмашым шуктыман. Регионлаште илыше марий йоча-влакым туныкташ туныктышо-влакымат ямдылыман. Тӱвырам, йӱлам вияҥдыме дене кылдалтше специалист-влакат мемнан дене огыт сите. Сандене Йошкар-Оласе кӱшыл, кыдалаш тунемме учрежденийлаште шинчымашым погышо специалист-влакым практикыш марий-влакын тӱшкан илыме кундемлашке колтыманак. Музык, художественный, изобразительный, кидмастарлык творчестве дене кылдалтше марий шӱлышан туныктышо ден специалист-влак мемнан дене моткоч кӱлыт. А лийыт ыле гын, мемнан шочшына-влак шочмо йылмыштым, тӱвыраштым, ыштыш-кучышыштым огыт мондо ыле. Шкеныштымат марий семын ужаш, шижаш да тидын дене кугешнаш тунемыт ыле. Нунымат шке шочмо йылмым, тӱвырам, йӱлам, калыкшымак пагалаш туныкташ кӱлеш.
Вес кундемыште илена гынат, вес йодыштат тургыжлдандарыде огеш керт: Марий Элыште илыше-влак кеч-могай сферыште манаш лиеш, пашам кычалын, уло Россий мучко кудалыштыт. Сандене паша верым ситарыме йодышымат тӱткырак ончен лекман.
С.НОСОВА
