УВЕР ЙОГЫН

Марий Элын ончычсо кугыжаныш пого министржым 6 ийлан эрык деч посна коденыт

Марий Элын ончычсо кугыжаныш пого министрже Наталия Хайруллова дене кылдалтше дела шотышто черетан заседаний 23 апрельыште Йошкар-Ола судышто лийын. Тушто тудым да кок эргыжым, Роберт ден Русланым, титаканлан шотленыт. 

Ушештарена: ончычсо министр взяткым налмылан, а эргыже-влак ты преступленийым ыштымаште коклазе лиймыштлан титаклалтыт.

Наталия Хайрулловам 2016 ий декабрьыште, а икмыняр жап гыч эргыже-влакымат  кученыт. Тиде дела шотышто суд ӱмаште октябрьыште тӱҥалын.

Суд тыгай пунчалым луктын: Наталия Хайрулловам 6 ийлан эрык деч посна кодаш да тӱшка режиман колонийыш колташ, взяткым налме 13 миллион теҥге кугыт штрафым тӱлыкташ; эргыже-влакым 5 ийлан пеҥгыде режиман колонийыш вераҥдаш. Тыгак ӱдырамашын палемдыме кугыт штрафым тӱлен пытарымешкыже погыжым арестоватленыт. Тылеч посна тудын ончыкыжым кугыжаныш должностьышто пашам ышташ праважым кораҥденыт.

Палемдыме почеш, суд утыжден пеҥгыде приговорым луктын огыл. Тушто ончычсо министрын пенсий ийготан улмыжым, а эргыже-влакын изи икшывышт кушмым шотыш налыныт.  

Руслан Хайрулловын адвокатшын палемдымыж почеш, нуно судын лукмо пунчалже дене огыт келше да ончыкыжым республикын Верховный судышкыжо апелляцийым пуат, палдара «7х7» интернет савыктыш.

Л.Камалетдинова.

Опубликовать в Одноклассники

Добавить комментарий