«Марий илем, лӱметым чын возем» — «Марийские селения России»
(Перечень наименований населенных пунктов компактного проживания народа мари Российской Федерации на русском и марийском языках).
Тыге маналтеш ХI Марий калык погын вашеш савыкталтше справочник. Тушко Пошкырт, Виче, Угарман, Пермь, Свердловск, Татарстан, Одо кундемлаште марий-влакын вераҥме 966 илемыштын, 65 кугурак эҥер ден ерын, кок курыкын, ик сергӱн лӱмыштым рушла-марла пуртымо. Книга журналист, туныктышо, мер пашаеҥ, марла возышо-влаклан пайдале.
Проект «Марий Эл» газет редакций гоч возалтын. Авторжо — РФ АФУН-ын марий пӧлкажым вуйлатыше, Марий Элын сулло журналистше Светлана Пехметова. Материалым чумырымо, фотом келыштарыме, дизайн ден версткым ыштыме пашам журналистикыште тыршыше йолташ-влак Анфиса Эманова, Екатерина Тетерина да Денис Речкин дене пырля шуктеныт.
Справочникым Марий Эл Республикын тӱвыра, савыктыш да калык паша шотышто министерствыжын полшымыж дене «2013-2025 ийлан Марий Эл Республикын кугыжаныш национальный политикыже» кугыжаныш программыж негызеш лукмо.
500 экземпляр дене лекше савыктыш Погынын делегатше-влаклан пӧлек шотеш лиеш.
Г.КОЖЕВНИКОВА
