У Торъял районысо Калыкым социально обслуживатлыме комплексный рӱдерыште «Кован кид шокшыжо» поро кумыл акций эрта. Тудын кышкарыштыже «ший ийготан» волонтёр-влаклан, тыгак моло кидмастар-шамычлан, инвалид да неле илыш пӧрдемыш логалше йоча-влаклан пушкыдо модышым, носким, пижым, шарфым да калпакым пидаш темлат.
Таче кечылан соцобслуживаний рӱдерыш икмыняр кидпашам конденытат. Пашаеҥ-шамыч нине арвер дене кызыт кожым сӧрастарат, а У ий вашеш нуным йоча-влаклан пӧлеклат.
Организатор-шамычын палемдымышт почеш, мутлан, йӧратен пидме пиж кидым веле огыл, чонымат ырыкта.
М.ИВАНОВА.
