Йошкар-Олаште Перинатальный рӱдерым чоҥымо шотышто публичный каҥашымаш почмо лийшаш, да республикыште илыше тӱрлӧ ийготан граждан-влакын шонымашыштым шотыш налаш кӱлеш, манын медицине тӧнежын кӱкшӧ технологиян корпусшым чоҥымо йодыш дене эртарыме совещанийыште Марий Элым вуйлатыше Александр Евстифеев.
«Объектын ойыртемжым шотыш налаш гын, Перинатальный рӱдер – тиде самырык еш-влакын темышт, туге гынат каҥашымашке тӱрлӧ ийготан граждан-шамычым ӱжса. Чаманен палемдем, мемнан дене калык министерствыште мо ышталтмым южгунам огеш пале улмаш. Сандене еҥ-влаклан каласкалаш кӱлеш. Тидым служебный тайне семын кучыман огыл. Арам огыл «корно карт» уло, да ме тудын деч огына кораҥ», – каласен регионым вуйлатыше.
А.Евстифеевын мутшо почеш, республикын правительствыже тиде объектым ончылгоч палемдыме почеш 2021 ийыште огыл, а 2020 ийыштак чоҥаш тӱҥалме шотышто чот тыршен.
«Перинатальный рӱдерым чоҥаш финансированийым налме шотышто кок ий лым лийде тыршенна. Кызыт оксам ойырымо. Ынде ме Россий Федерацийын Минздравше дене пеш чак пашам ыштена. Икмыняр теме уло, эн ончычак – кызытсе жаплан пеш кӱлешан проект документаций, экспертизе ден смете, тыгак республик велым финансироватлыме теме-влак. Ойырымо средствам шке жапыштыже кучылташ манын, нине йодышым ме жапым шуйкалыде лончылышаш улына. Ушештарем, Перинатальный рӱдерым 2021 ийыште чоҥен шуктыман», – манын Александр Евстифеев.
Тазалыкым аралыме министр Марина Панькован увертарымыж почеш, 12 ноябрьыште финансированийын кугытшым пеҥгыдемдыме нерген серышым налме. Пуртымо вашталтыш-влак дене келшышын, тудым тӧрлатыме, да республикланна федеральный субсидийын кугытшо 772 млн. теҥге лиеш, регионын бюджетше гыч 32 млн. теҥге ойыралтеш.
«Тиде объект тыгай смете дене республикын историйыштыже икымше гана чоҥалтеш. Сметын суммыжо 1,5 миллиард утла теҥге. Тыгай объектым регионыштына бюджет окса дене чоҥымо огыл», – ешарен Марина Панькова.
Перинатальный рӱдерым чоҥымо паша кугу ответственностьым йодеш, сандене Марий Элым вуйлатыше объектыште чӱчкыдын лияш сӧрен.
Кӱкшӧ технологиян корпусым план-график почеш шушаш ий март тӱҥалтыште чоҥаш тӱҥалшаш улыт.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
