Параньга районлан - 90 ий

«Вӱд деч посна нигӧ илен ок керт»

Лийын районышто ик кугу коммунал озанлык предприятий. Тудо шуко тӱрлӧ пашам шуктен. Но отрасльым пужен ышташ тӱҥалмеке, тудын ик ужашыже «Водоканал» муниципал унитарный предприятийыш савырнен. Тиде 2005 ий ноябрьыште лийын. А 2013 ий июль гыч тудым И.Т.ХАСАНОВ вуйлата.

– Ильгам Талгатович, Те предприятийым вуйлаташ тӱҥалме деч ончычак вет тушто пашам ыштенда?

– Да, мый тыште 2007 ий гыч тӱҥ инженер семын ышташ тӱҥальым.  Предприятий тунамак вӱд пуч да канализаций объект-влакын пашаштлан, тудым олмыктымылан мутым кучен. Тыгак районысо калыклан, промышленный ден социальный сфере предприятий-влаклан, моло потребительлан йӱшаш да мушкылтшаш вӱдым ситарен шоген. Эше тудлан район рӱдысӧ коммунал мончан пашажым виктараш ӱшаненыт.

Предприятий кызыт 85,3 километр вӱд пуч да 14,3 километр канализаций сетьым, вӱд тулымо 24 верым, канализаций ден насос станцийым да очистной сооруженийым обслуживатла. Адакше илыме вер ден социальный сфере учрежденийлам веле огыл шинча ончылныжо куча, тыгак тӱрлӧ собственность форман предприятий-влаклан вӱд пуч да канализаций озанлык объектышт дене  чын пайдаланаш организационный ден технический полышым пуэн шога.

– Тиде, мутат уке, кугу паша да кугу вийым йодеш.

– Тачысе кечылан предприятийыштына 58 еҥ тырша. Тушто ик лу ийым веле огыл ыштыше радамыште Земфира Гайнановна Шарафутдиновам, Фарида Заудатовна Габдрахмановам, Рузаль Магсумянович Каримовым, Ильгис Равилевич Фазрахмановым, Газинур Габдельнурович Ахметзяновым, Ильдус Габдулмансурович Назмутдиновым да молымат ончыкташ лиеш. Пытартышыже аварийно-олмыктымо пашам шуктышо слесарь-влак бригадым вуйлата, мастерлан ышта да 25 ий утла жапыште  кугу пагалымашым сулен.

Тыгаяк вес бригадыште тыршыше слесарь-влак Ильдар Габдул-Манзурович Назмутдиновым, Алексей Иванович Казанцевым, Нурислам ГайфулловичГабдуллиным, Заки Мухаматтакиевич Афандиевым, Василий Петрович Васильевым да Ильхам Рузалович Рауповым сай велым палемдыме шуэш. Нуно пеш кӱлешан пашам шуктен шогат.

– Чӱчкыдынак неле игече условийыште ышташышт логалеш, векат?

– Тенийсе телым налаш гын, поснак. Лум йымалне мланде верын-верын 190 сантиметр келгытыш кылмен. Сандене аварий годым кылме рокым кӱнчымӧ да олмыктымо паша пычкемыш йӱд марте шуйнен. Каныш да пайрем кечым ончыде. Вет вӱд деч посна нигӧ илен ок керт. А ынде шошо вӱдшор пагыт изи огыл нелылыкым луктеш. Лавыран годым кӱнчаш поснак йӧсӧ. Вара шокшо кеҥеж лишемеш. Мушкылташат, йыраҥыш шавашат еҥ-влак вӱдым шуко кучылтыт. Тунам тудо кокланже огешат сите. Сандене вӱд дене переген пайдаланашат йоде ок лий.

– Вӱд пучым, канализацийым шотыш кондаш, олмыкташ, мландым пургедаш виян технике кӱлеш…

– Мутат уке, техникына чотак тоштемын ыле. Йӧра, 2020 ийыште Марий Эл правительстве предприятийланна технике средствым налаш 11,45 миллион утла теҥгем ойырыш. Ты окса дене УАЗ 390945 автомобильым, Беларусь-82.1 тракторым, вакууман КО-спецмашинам, 2ПТС-4,5 трактор прицепым, погрузчик-экскаваторым, ЭТЦ-1609 траншей экскаваторым, тракторлык ЛКТ-3,5П пелеприцеп-цистерным налме.  Иканаште тынар техникым налаш – манаш веле. «Водоканал» МУП правительствыланна кугу таум ышта.

Мучашлан Параньга кундемыште илыше да шочшо-влакым районлан 90 ий темме лӱмгече лишемме дене шокшын саламлем да чыла шотыштат сайым гына тыланем!

Юрий ИСАКОВ

Опубликовать в Одноклассники

Добавить комментарий