Шукерте огыл Йошкар-Оласе Вӱд спорт полатысе бассейныште я тургыжланен, я куанен кычкырыме йӱк шергылтеш. Тиде иймаш дене «Кубок золотого кольца» всероссийский таҥасымашын II этапышкыже ушнышо-влак улыт. Тушко элнан 23 регионжо гыч 14 ияш марте 390 участник чумырген. Ончаш толшыжат ятырак лийыныт. Поснак – спортсмен-шамычын ача-авашт.
– Тыгай кӱкшытан турнир Йошкар-Олаште эрта. Верысе спортсмен-шамычлан вийым тергаш, опытым погаш – путырак сай йӧн. Ты таҥасымашым чапле спорт пайрем семынат палемдыман. Иймаш – спортын мотор, но неле видше. Його деч утлен, пашам тыршен ыштыман, вий-куатым пыштен тренироватлалтман, – каласеныт саламлымыштла Молодёжный политике, спорт да туризм министрствын физический культур да спорт дене управленийжын начальникше Е.Пронина ден Марий Элыште Олимпийский советын президентше В.Чумаков.
Лӱмынак ты таҥасымашке толшо уна, Российын спорт мастерже, Олимпийский модмашын участникше (2004, 2008 ийла) Е.Богомолова чылаштым шокшын саламлен, участник-влаклан «куштылго» вӱдым тыланен.
Иймаш капкыллан, поснак тупрӱдылан моткоч пайдале. Тудо стресс дечат утлаш полша. Таклан огыл Йошкар-Оласе физкультурно-врачебный диспансерыште тыршыше специалист-влак тазалыкым аралаш, капкылым пеҥгыдемдаш, спортын кєлан могай видшым ойырен налме годым ты видшым мондаш огыл манын темлат. Тӱҥалтышлан мӧҥгыштат чывылалташ тӱҥалаш лиеш.
Йӱштӧ вўдыш пураш ида лӱд
Ала-молан айдеме йӱштӧ вӱд деч лӱдешак. Но, специалист-влакын ойлымышт почеш, йӱштӧ вӱд дене чывылалтме кылмен черланыме да моло чер деч арала. Кузе?
Йӱштылмылан кӧра айдемын капыштыже вӱргорно туртеш, а тидыже температурым волта. Тыгодым рефлекс семын кӧргыштӧ вӱр чӱчкыдын кошташ тӱҥалеш. Тидыже организмыште веществан вашталмашыжым вияҥда. Йӱштӧ вӱдышкє пурымо годым кап-кыллан стресс лиеш, адреналин нєлталтеш. Тидыже, мутат уке, экстремал йӧн годым лиеш. Виян да вучыдымо стресс иммунный системым пытара гын, тыглай, физиологический стресс организмлан куатым ешара. Тыгай годым корштымым от шиж, шўм чотрак кыраш тӱҥалеш, вуйыштат вӱргорно сайын пашам ышта. Иммунитет вияҥеш да эркын-эркын шокшештат.
Чывылалтме процедурым мӧҥгыштє душ йымалнат ышташ лиеш. Шке ӱмбаке ончыч йӱштӧ вӱдым, а вара шокшыракым колтыман але ведра гыч опталман.
Кеч-могай сферыште тыршыше-влак физкультур да спорт дене кылым кучен кертышт манын, кундемыштына тўрлє спорт объект, сооружений-влак чоҥалтыт. Район рӱдерлаште ФОК-влак омсаштым почыт, а туштыжо, мутат уке, бассейн уло. Тыге паша деч варат пайдалын канаш лиеш.
Калыкнан тазалыкшым пеҥгыдемдыме йєным шукемдаш Марий Эл правительствын тӱҥалмыже, полышыж дене республикнан Молодёжный политике, спорт да туризм министерствыже «Демографий» национальный проект почеш «Спорт – илышын нормыжо» федерал проектыш ушнен.
Тидат лишыл жапыште сай лектышым пуа манын ўшанена.
Е.Эшкинина.
