УВЕР ЙОГЫН

Вуйым саваш йӧным ыштеныт

Марий Элысе ОНФ-ын чолга еҥже-влак Медведево районысо Пелэҥер ял калыклан Кугу Отечественный сарыште вуйым пыштыше-шамычлан шогалтыме шарныктышыш эрыкын логалаш йӧным ыштеныт.

Шарныктышын еҥ кудывечыш, савар кӧргыш, логалмыже да тушко кумыл йодмо семын пураш лийдыме нерген вуйшиймашым налмек, «фронтовик-шамыч» верыш лектын коштыныт да серышыште возымо дене тӱрыснек келшеныт, тидын шотышто прокуратурыш обращенийым колтеныт. Медведево районын прокуратуржо Шойбулак ял шотан илем администрацийлан мланде законодательствым пудыртымылан представленийым  ыштен.    

Тергымаш рашемден: Пелэҥер ялысе шарныктыш кусараш лийдыме озадыме погылан шотлалтеш. Шойбулак ял шотан администраций муниципальный мландым контрольышто кучыдымыж деч посна эше кусараш лийдыме погылан правам жапыштыже регистрироватлен огыл. Тидын дене келшышын, администрацийым вуйлатышылан представленийым ыштыме», – манеш ОНФ-ын региональный штабшын еҥже, «Демос» кычалше отрядын командирже Дмитрий Шипунов.

Тылеч посна Медведево районын прокуратуржо мланде участкым закондымын поген налмылан да тудын дене пайдаланымылан титакан-влакым административно мут кучаш шогалтыме йодышым рашемдашлан материалым контролироватлыше орган-влаклан колтен.

М.ИВАНОВА

Опубликовать в Одноклассники

Добавить комментарий