КРИМИНАЛ УВЕР ЙОГЫН

Адакат лӱйкалымаш…

 

 

20 сентябрьыште Пермьысе кугыжаныш национальный шымлыше университетыште кугу туткар лийын.

Тиде кечын эрдене тушко самырык еҥ пурен да лӱйкалаш тӱҥалын. Азапыште 6 еҥ колен, икмыняр еҥ сусырген. Эмганыше-влакым чылаштымат Пермьысе больницылашке вераҥденыт. Эн чот нелын сусыргышо шым еҥым 21 сентябрьыште эрдене Москвашке самолет дене наҥгаеныт, палдарен шке Instagram-акаунтыштыжо регионын здравоохранений министрже Анастасия Крутень. Тудо возен: «Михаил Мурашкон (РФ здравоохранений министр) кӱштымыж почеш таче (21 сентябрьыште) МЧС-ын бортшо дене шым чот неле черлым федеральный клиникылашке умбакыже эмлаш наҥгаят. Молышт Пермьысе клиникылаштак эмлалташ тӱҥалыт».

РФ образований да науко министр Валерий Фальковын мутшо почеш, туткарыште эмганыше-влаклан, тыгак колышо-влакын лишыл еҥыштлан университет да регион деч полыш, тидын годымак психологический полышат, лиеш.

ЧП лиймылан кӧра регионысо вузлаште, ссузлаште да школлаште тунеммашым чыреныт. Учреждений-влаклан ик кечым лӱдыкшыдымылыкым кугемдаш пуэныт.

21 сентябрьыште Пермь крайыште  траур кече увертаралтын.

Туткарыш логалше да нунын лишыл еҥыштлан меат чаманымашнам ойлена.

Юмо аралыже тыгай лийме деч…

Л.Камалетдинова

 

 

 

Опубликовать в Одноклассники

Добавить комментарий