2 мартыште Йошкар-Олаште «Ӱярня» марий кечышот йӱла пайремым палемдат.
Телым ужатыме да шошым вашлийме пайрем Шорыкйол деч шым арня эртымеке толеш. Республикысе Марий тӱвыра рӱдер тений тудым Марий паркыште эртара.
Тушко фольклор коллектив-влакым вучат. Йодмашым mari-centr_konkurs@mail.ru электрон адресыш колтыман. Лекше йодышым (88362) 45-88-51 телефон дене рашемдыман.
Пайремыш ушнышо коллектив-влак Ӱярням эртарыме йӱлам, калык кочкыш презентацийым ямдылышаш улыт.
А 20 февральыште Оршанке районысо Кугунур тӱвыра пӧртыштӧ Ӱярня пайремым эртарыме шотышто республиканский семинар-практикум лиеш. Мероприятийыш районысо тӱвыра пӧлка-влакын пашаеҥыштым вучат. Нунын ончылно марий калыкын историйже да этнографийже, музыкальный да театральный сымыктыш, юмыйӱла дене кылдалтше шанчызе, специалист-влак докладым лудыт. Нуно пайремын ойыртемже, тудым кузе эртарыме, калык модыш, куштымаш дене палдарат. У Торъял, Морко да Звенигово районласе фольклор коллектив ден тӱвыра пӧлка-влакын специалистышт йӱла пайремым эртарыме шке опытыштым ончыктат. Мероприятий 11 шагатлан тӱҥалеш.
«Йоча ӱярня» тений 1 мартыште Шернур районысо Кукнур селаште верланыше Марий Йӱштӧ Кугызан илемыштыже лиеш. Тушко ушнаш кумылан школ коллектив-влак тыгак Марий тӱвыра рӱдерыш йодмашым колтышаш улыт.
Кажне образовательный учреждений гыч куд еҥан командым ямдылыман. Нуно «Чевер Ӱярня» конкурсышто шке усталыкыштым ончыктат. Тудо кум заданий гыч шога: пайремын символжым – «Ӱярня кувам» ыштен да «Ӱярня мелнам» кӱэштын, презентацийым эртарыман; «Ӱярня такмак» муро таҥасымаште шке усталык дене палдарыман.
Светлана Носова
Авторын фотожо
