Йошкар-Оласе «Теплая речка» трактирын пашаеҥже-влак марий калык кочкышым – ӱячам – ыштыме дене тӱнямбал рекордым шынденыт.
Ты мероприятийым эртараш Марий Элын Паша да социальный аралымаш министерствыже ден Марий кугыжаныш университет полшеныт. Ӱяча – тиде ложаш дене ыштыме да ӱйыштӧ жаритлыме йыргешке шере кочкыш. Тудым мӱй дене варат. Чылаже 20 тӱжем ӱячам ыштеныт, тӱрысшӧ 263 килограммыш шуын. Рекордым регистрироватлаш Москва гыч ресторан критик Олег Назаров лӱмын толын. А варажым шере чесым республикысе социальный учрежденийлаш колтеныт.
C.Носова
Снимкыште: рекордым шындыме годым
