Марий Эл вуйлатыше Юрий Зайцев Волжск олан у мэрже Павел Демин дене паша вашлиймашым эртарен.
Республик вуйлатыше палемден: депутат-влакын тудын кандидатурыж верч ик ой дене йӱклымышт ӱшанымышт нерген ойла.
– Ола округ вуйлатыше-влак ончылно шогышо шуко задачым ме иквереш шуктен кертына манын ӱшанем. Икмыняр объектыш миен толаш, пӱсӧ йодыш-влакым рашемдаш да мом ыштышашым палемдаш мый Волжскыш толшашым планыш пуртем, – каласен республик вуйлатыше.
Павел Демин шуктымо пашаж дене палдарен. Олаште илыше-влак дене вашлиймаш деч вара неле йодыш-влакым рашемдышаш шотышто корно карте ышталтын.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
