И.С.Палантай лӱмеш тӱвыра да сымыктыш колледжын Национальный искусство гимназийжын виолончелист-влак ансамбльже Москош миен коштын.
Талантан икшыве-влак Музыкын тӱнямбал пӧртыштыжӧ эртаралтше «Свет надежды» концерт программышкыже ушненыт. Марий йоча-шамыч дене пырля тыгак Моско, Ярославль, Омск, Санкт-Петербург, Сочи да Екатеринбург гыч тӱрлӧ конкурслаште сеҥыше, стипендиат да Владимир Спиваковын поро кумылым ончыктымо фондшын программыжын участникше-влак мастарлыкым ончыктеныт.
Моско гыч йоча-шамыч шочмын куан кумылан пӧртылыныт. У ий деч ончыч элнан рӱдолашкыже миен толмышт поро шарнымашым коден.
А.БАЙКОВА