Марий Эл вуйлатыше Юрий Зайцев республикысе суд-влакын 2024 ийысе пашаштым иктешлыше совещанийыштыже лийын.
Марий Элын Верховный судшын председательже Артем Грачевын палдарымыж почеш, ӱмаште республикысе чыла кӱкшытан суд-влак 226 тӱжем наре дела ден материал-влакым онченыт. Тидыже 2023 ийысе деч 8,3 %-лан шукырак.
– Электрон правосудийым вияҥдымылан кугурак тӱткышым ойырымо, инновацийым чолган пуртымо дене те судопроизводствылан ӱшаным пеҥгыдемдеда, – каласен республик вуйлатыше.
Марий Элын правительствыже мировой юстицийым эшеат саемдыме йодышлан тӱткышым ойыра. Тыге ӱмаште мировой судья-влакын верланыме 4 оралтыштышт олмыктымо пашам шуктымо. Тидлан 14 миллион утла теҥгем кучылтмо. Пытартыш кум ий жапыште у да лӱмынак келыштарыме зданийлашке 8 суд участкым кусарыме.
– Суд-влакын, нунын аппаратыштын пашаеҥыштлан тыршашышт сайрак лийже манын ме эн ончычак граждан-влаклан йӧнан да келшыше условийым ыштена, – палемден регион вуйлатыше.
Совещаний мучаште республик вуйлатыше Шернур районный судын судьяже Диана Поповалан Тауштымашым кучыктен.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
