Ӱшаным огыт йомдаре
«Защитники Отечества» регионысо фонд спецоперацийын вич ветеранжылан спорт протезым ойырен.
Нунын кокла гыч иктыже – Специальный военный операцийын ветеранже «Мужество» орден дене палемдалтше, регионын следж-хоккей дене сборный командыжын участникше, «Герои Марий Эл. Талешке-влак» программыш ушнышо Алексей Блинов.
– Штурмовой дивизийыште служитленам. Икымше задачым шуктымо годымак нелын сусыргаш логалын. Тунам ик татыште пӱтынь илышем волгенче семын эртен, но ушым йомдарен омыл. Кӧргӧ виемым погалтен, шканем шке икымше медицине полышым пуэнам. Сусыргымем нерген раций дене увертаренам. Варажым мыйым эвакуатор дене луктыныт. Госпитальыште пел ий эмлалтынам. Пел йол деч посна кодынам, протезым шынденыт. Тыге пӱралтын гын, ончыкыжо у шонымаш дене илыман, – ойла Медведево районын эргыже. – Тыглай протез ден спорт протез коклаште ойыртем шижалтеш. Кызыт мый эрдене пием дене пырля куржталаш йӧратем. Тыглай протез дене изиш нелырак ыле. «Защитники Отечества» кугыжаныш фондын верысе филиалжылан да социальный координаторем, Геройын пелашыже Светлана Тороповалан полшымыштлан тау.
Алексей Блинов – тыгак ече спортын ушанле йолташыже. Ончыч тренер Сергей Анатольевич Кугергин дене ямдылалтын. Спецопераций деч вара лач тудын денак «Корта» ече базыште коштын ончен. Тыге, физический формым кучаш манын, тӱҥалтыште эркын-эркын 5-6 километрым эртен. Тений мартыште Ханты-Мансийскыште спортын теле видше дене «Кубок Защитников Отечества» всероссийский таҥасымаште Марий Эл гыч Никита Михайлов дене коктын вийыштым тергеныт.
Ветеран-влак спортышто тӱрлӧ йӧн дене сай результатыш шуын кертмым шке примерышт, пеҥгыде койыш-шоктышышт дене пеҥгыдемдат.
Елена Эшкинина
Фотом Алексей Блиновын еш альбомжо гыч налме
