Россий президентым сайлымашке моло ийласе дене таҥастарымаште калыкын тений йӱклаш шукырак толмыжым, тыгак Владимир Путиным шукырак поддержатлыше-влакын чотышт кушмо нерген Марий образований институтын ректоржо Лариса Овчинникова, «Важные новости дня» сетевой изданийын тӱҥ редакторжо Михаил Винокуров ойленыт.
М.Винокуров Россий президентым сайлымашын Марий Элысе тенийысе лектышыжым икмыняр ий ончычсо дене таҥастарен. 2018 ийыште республикыште 66,43% еҥ йӱклен гын, шукерте огыл эртыше сайлымаште ты чот 68,91% марте кушкын. Тидын годым Российын кызытсе президентшым поддержатлыше еҥын чотшат кугемын.
«Куд ий ончыч Владимир Путин верч йӱкым республикыште илыше 73,99% еҥ пуэн. Кызыт тиде чот 84,24%-ыш шуын.
КПРФ-ын представительже Павел Грудинин 2018 ийыште Марий Элыште 14,55 % йӱкым поген. Николай Харитоновлан тений 6,11% йӱкым пуэныт.
Владимир Жириновский верч 2018 ийыште Марий Элыште 6,88% еҥ йӱклен. 2024 ийыште ЛДПР-ын кандидатше Леонид Слуцкийлан 3,36% йӱкшым пуэн
2018 ийыште Ксения Собчак Марий Элыште 1,35% йӱкым поген. 2024 ийыште Владислав Даванковлан 4,72% йӱклен», — каласен М.Винокуров. Тыгодым тудо Марий Элысе Избиркомыш нарушений нерген жалобо-влак пурен огытыл манын палемден.
Марий образований институтын ректоржо Лариса Овчинникова шукерте огыл эртыше Россий президентым сайлымашке калык рӱж погынен толын манын палемден. Тыгак 2018 ийысе (57.54%) ден 2012 ийысе (65.34%) сайлымашла дене таҥастарымаште тенийысе сайлымашыш калык шукырак толеш манме прогнозат шукталтын манын каласен. 2024 ий мартыште сайлымашыш Россий мучко 74% еҥ миен. Марий Элыштат тений шукырак калык йӱклен. Поснак районлаште шукырак ушненыт.
«Мемнан регионналан тиде сай результат. Каласыман, республикнан кум районыштыжо сайлымашыш мийышын чотшо 85 %-ым эртен. А тиде элыште кокла шот дене таҥастарымаште ятырлан шукырак. Олаште илыше-шамыч ялысе дечын шагалрак йӱклат.
Ӱшанем, элна мучко сайлымашаш шуко еҥын мийымыже патриот шӱлышан улмышт дене кылдалтын. Еҥ-влак чылажымат шонкален, вискален, сайлымашыш миеныт, вет нунын йӱкышт гыч элнан могай ончыкылыкшо лийшашыже шога», — манеш Л.Овчинникова.
Россий ЦИК-ын данныйже почеш, 100% протоколым ончымеке, Владимир Путин тенийысе сайлымашыште сеҥышыш лектын. Тудлан 87,28% еҥ шке йӱкшым пуэн.
Фотом еш альбом гыч налме.
Снимкыште:Л. Овчинникова.
