Ик ой дене КУЧЕМЫШТЕ

Азам ышташ йӧнан лийшаш

Юрий Зайцев Волжск оласе рӱдӧ больницын азам ыштыме отделенийжылан зданийым чоҥымо пашам терген.

Республикым вуйлатышын пашажым жаплан шуктышо у медицине тӧнежыште пациент-влакым приниматлыме помещенийым, азам ыштыме индивидуальный залым, палатым, операционный блокым да реанимацийым ончен, шукталтше пашан шырымжым сай велым аклен да отделенийын ӱдырамаш-шамычлан йӧнан лийшашыжым палемден. Тыште чоҥымо-монтаж пашам шыже тӱҥалтышлан мучашлаш палемдыме.

Ю.Зайцев тошто эмлымвер ден у зданий коклаште шокшо вончакын уке улмыжым шекланен да тудын кӱлешлыкшым палемден, проект-смете документацийым уэмден ямдылаш кӱштен.

Тӱҥ врач Дмитрий Фризинын каласкалымыж почеш, кызыт зданий кӧргым олмыктен пытарат, тыштак инженер коммуникацийым шупшыт, кумдыкым тӱзатат.

Чоҥымо-монтаж пашалан 338 миллион наре теҥгем колтымо, медицине оборудований ден мебельым налаш – 100 миллион утла теҥгем. Оксам республикым социально-экономически вияҥдыме индивидуальный программым илышыш пуртымо кышкарыште ойырымо. Тымарте 60 миллион наре теҥгеш медицине оборудований ден мебельым уже налме.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий