Пошкырт кундемысе «Эрвел марий» калыкле-тӱвыра автономий председательын алмаштышыже Ирина Аптыкаева «ЖЕНЩИНА — МАТЬ НАЦИИ» VI Всероссийский конкурсышто сеҥышыш лектын.
Башкортостан Республикын «Башкир ӱдырамаш-влак общество» регионысо мер организаций ӱдырамашын статусшым нӧлталаш да тудын рольжым илышыште вияҥдаш манын ты конкрсым ынде кудымшо гана «Единый Россий» партий да Башкортостанын Калык-влак келшымаш пӧртын полшымышт дене эртарен. Тений тушко 18 гыч 93 ияш марте мер илышыште чолга 500 ӱдырамаш ушнен. Мо оҥайже: нуно Российын тӱрлӧ регионжо гыч лийыныт. 150 ӱдырамаш финалыш лектын. Нунын коклаште Благовещенск районын муниципальный этапыштыже сеҥыше Ирина Аптыкаеват лийын.
Ирина «Женщина – мать» номинацийыште сеҥен. Шке жапыштыже туныктышылан тунем лекше ӱдырамаш таче «Орифлейм» компанийын директоржо, Марк ден Софья Атласовмытын тӱнямбал академийжын кумшо курсыштыжо шинчымашыжым нӧлта. Шуко шочшан сай ава, эшежым шке олаштыже «Оҥгырйӱк» марий фольклор ансамбльым вуйлата.
Ты коллективыш тудын гаяк мураш-кушташ йӧратыше чолга ӱдырамаш-влак коштыт. Нуно Пошкырт кундемын моло районлаштыжат шке мастарлыкыштым ончыктат, тӱрлӧ конкурсышто участвоватлат да эре гаяк ойыртемалтыт. Пытартыш сеҥымашышт кокла гыч «Возрождение» тӱнямбал фестиваль конкурсышто икымше степенян лауреат лӱмым, «Золотая Вологда» хореографий сымыктыш тӱнямбал конкурс-фестивальыште гран-прим налмым да моло наградымат ончыкташ лиеш. Кажне ийын коллектив отчёт концертым ончыкта, тӱрлӧ пайремым эртарымашке ушна. Мутлан, кодшо ийын Москваште эртыше национальный костюм шотышто кӱкшӧ модо евразийский конкурсыштат шке вийжым терген. Эсогыл Россий телевиденийын икымше каналысе «Поле чудес» передачыштат лийын. А телефон дене мутланыме годым Ирина куан уверым каласыш: эртыше кечылаште ансамбль калык лӱмым сулен налын.
Ирина Валентиновна марий мер илышыште моткоч чолга. Калык усталыкым вияҥден толмаште веле огыл. Поро кумылым ончыктымо тӱрлӧ мероприятийыш, шуко шочшан еш, йӱлышӧ-влаклан полышым пуымо акцийыш ушнаш моло-шамычымат кумылаҥда.
Владислав пелашыж дене пырля ныл эргым ончен куштат. Тиде еш национальный еш конкурслаште эре гаяк сеҥышыш лектеш. Игорь, Юрий, Илья, Владимир ача-аваштлан сай эҥертыш улыт. Кугуракышт изиракыштлан полшат, туныктен шогат. Чылан спортын тӱрлӧ видше дене кылым кучат, сеҥымашышт дене ача-авам куандарат.
Еш оза Владислав Ильич шке жапыштыже Афганистаныште служитлен, кызыт пожарныйлан ышта. Тудат пелашыжын вуйлатыме ансамбльжын чолга участникше. Икманаш, Благовещенск олаште тыгай мотор марий еш улмылан куанаш гына кодеш.
Светлана Носова
Снимкыште: Ирина Апатыкаева конкурсышто палемдалтме деч вара
Фотом И.Аптыкаеван соцкыл лаштыкше гыч налме.
