Кугезе марий кечышот 32 ийлан палемдалтын. 2024 ий – Йӱксын идалыкше. Лач ты кайыкын койыш-шоктышыжо вес ийын мемнан кумылнам вӱчкаш тӱҥалеш. Кечын, тылзын, шӱдырын вийышт илян-шамычлан илашышт шкешотан шӱлышым, койышым пуат. Вес ийын поснак вӱд деке пагалымаш лийшаш, вет йӱксӧ вӱд деч посна ок керт.
Гигинене правилым эскераш мондыман огыл. Но вӱдым аныклен кучылтман. Вӱдым лавыртыме семынак, шке койышым осал шомак, чаҥга, шояче улмо дене локтылман огыл. А зороастрий календарь почеш, лач тудлан марий кечышот радам негызлатеш, йӱксӧ идалыкыште шуко интриге, шукталт кертдыме ӱшандарен ойлымо шомак лийыт.
Тылеч ончыч эртыше Йӱксӧ идалык-влак поро да куаным кондышо лийыныт манын возат. Чыла гаяк илышысе событий-влак эре сайлан гына лийыныт. Кеч-могай сиуацийыштат чын сеҥен. Йӱксӧ вӱдыштӧ илыше кайыквусын кугыжаштлан шотлалтеш, тыныс, ласка илышым символизироватла.
Йӱксӧ тотемын эн аклыме койышыжо – весылан нимогай осалым ышташ огыл, ӱшнле лиймаш, а тиде кок койыш духовный идеаллан шотлалтыт. Материальный пого тудлан шерге огыл. Чаҥгалык, шойыштмаш, ужалымаш марте нигунам шкенжым ок волто, идеалжылан ӱшанле кодеш.
Йӱксылан ваштареш улшо тотемлан лудо шотлалтеш. А ты сурткайык «каваште» чоҥештылше огыл, интересшат, шонымашыжат, койыш-шоктышыжат ӱлнӧ улыт: шкем йӧрата, утыжым шонкала, нигӧлана ок ӱшане… Лач тыгай еҥ-влак деч йӱксӧ койышан еҥ кораҥ каяш тыршаш тӱҥалеш.
Астролог-влак 2024 ий ӱдыр-ӱдырамаш-влаклан шуко сайым кондышаш манын ӱшандарат. Поснак еш илышлан ӱшанле улшо вате-марий-шамычын чыла сай лиеш. А шкет улшо-влак пиалым вашлийыт, йӱксат тидлан полшаш тӱҥалеш.
Шкем духовно кушташ да шонымым илышыш шыҥдараш йӧн лектынак шогаш тӱҥалеш. Йӧратыме пашам ыштыше-влак поснак сай лектышыш шуыт. Религий сферыште шуко вашталтышым сӧрат. Но йӱксын идалыкше 21 мартыште гына тӱналеш. Сандене кызытеш ямдылалтса.
Мыскара йоре
*Ешыште марий ден вате коклаште чыла иктор лийшаш: пайрем кожым ӱдырамаш сӧрастара, а тудын йымаке пӧлекым марийже оптышаш.
*Мом мый У ий дечын вучем: кугу пачке нервым, хронический тазалыкым, эмлен керташ лийдыме пиалым да эре оварген шогышо чондайым!
*У ийым парым дене вашлийман огыл, язык маныт, сандене чылаштлан йыҥгыртышым, ушештарышым… Чаманем мый нуным.
С.Носова ямдылен
