Кугече арням православный-влак ярминга дене мучашленыт. Чарла кремльыште латкок шагат кечывалым тудым Йошкар-Оласе да Марий архиепископ Иоанн почын.
Пайрем кумыл кремльын чыла лукыштыжо шижалтын. Ик вере школышто тунемше-влак шке кид дене ыштыме тыгыде сатуштым ужаленыт. Вес вере апшат, шун дене атышӧрым ыштыше, мозаикым оптышо-влак шке мастарлыкышытым ончыктеныт… Шке ыштыш-кучышым ужалышыжат ятырын лийыныт. Чаным кырен ончаш кумылан-влакланат тыгай йӧн лийын.
Тидын годымак сценыште пайрем программе каен. Юмын шӱлышан, шочмо элым йӧраташ кумылаҥдыше муро-влак йоҥгеныт, палыме артист ден коллектив-влак шке мастарлкыштым ончыктеныт. Православный шӱлышан книга, моло тыгыде, черке сату шуко ужалалтын. Ярмингаш толшо-влакым шылан пучымыш да чай дене сийленыт.
С.Носова
Снимкыште: Ярмингаш толшо калык архиепископым вашлиеш.
М. Скобелевын фотожо
