ӰДЫРАМАШ КОРНО

Ӱмыргорно: «Ынде Интернет дене келшем», –

манеш Оршанке районысо Кугу Ӧрша ялыште шочын-кушшо, Оршанке педучилище деч вара Волжский районысо Карай школыш направлений дене толшо, йоча-влакым 45 ий туныктышо, тышечын 28 ийжым завучлан ыштыше, Марий Элын Чап грамотыж дене палемдалтше, сулен налме канышыш лекме деч вара икымше ий мӧҥгыштӧ шинчыше, РСФСР калык просвещенийын отличникше Валентина Арсентьевна Абакумова. 

– Ончычшо, поснак у тунемме ий тӱҥалмек, шкемым кушко чыкашат ом пале ыле: чонем чарныде вургыжын, школышко, йоча-шамыч деке ӱжын. Вара эркын-эркын лыпланышым. Икшывем-шамыч пӧртышкӧ вай-фай роутерым шынденыт, сандене Интернет дене кумданрак пайдаланаш тӱҥальым, «Одноклассники» сайтыште регистрироватлалтым да илаш оҥайрак лие, – воштылеш Валентина Арсентьевна. – Кызыт эрдене кынелам, зарядкым ыштем, мушкылтам, молитвам лудам, вара телевизорым чӱктем, чайым йӱмӧ годым тӱня увер дене палыме лиям. Марий радиом колыштам. Мӧҥгӧ сомылкам ыштылам. А кечывал деч вара йолташ вате-шамыч дене пырля уремыште нойымеш коштына. Карайыштак ешыж дене илыше Ирина ӱдырем яра шинчаш, йокрокланаш ок пу: я ик вере колта, я вес вере ӱжеш – эре иктаж-могай заданийым пуа.

Такшымже Валентина Арсентьевнам яра от шинчыкте. Телым, конешне, пашаже шагалрак, но лум опта гын, куана веле – кольмым налын, кудывечым, капка ончылым тыманмеш эрыктен шында. Каныш кече вашеш, поснак Владислав эргыжын Волжск ола гыч ешыж дене толмыжлан, тутло кочкышым ямдыла, мончаш олта. А кеҥежым!.. Кеҥежым илалше ӱдырамашым урем гыч пӧртыш, манмыла, кандыра дене шӱдырен от пурто. Пакчаштыже шогылташ моткоч йӧрата. Эн проста, эн шулдакан тӱрлӧ пеледышым туге шындылеш, манмыла, оласе клумбым шӱвалеш. Кушкылжо эр шошо гыч лум вочмеш кажныже шке жапыштыже клумбо кугыжа але кугыжа вате гай ковыртатат.

– Южгунамже дизайнер дечат виянла чучеш, – аважын ыштыш-кучышыжым, моторлыкым ужын да ыштен моштымыжым куанен палемда Валентина Арсентьевнан Ирина ӱдыржӧ. – Авам сад-пакчам веле огыл, пӧрткӧргымат кучен мошта. Южгунам ӱжеш да тидым але тудым налмыжым, ыштымыжым ончыкта. Кухньышко йошкар-шем тӱсан у мебельым, тудланак келшыше йошкар холодильникым шындымыж дене мыйымат ӧрыктарыш. Вараже окна чаршамат, кӱварыш пыштыме ковёрымат тыгайракак тӱсаным нале. Мемнам – кок икшывыж ден кум уныкажым – пеш куандара.

Валентина Арсентьевна мебель ден техникым налмыж дене веле огыл, пӧрткӧргым пужен кыдежлыктымыж, кухньо покшелан пеш чапле да чатка коҥгам оптыктымыж денат ӧрыктара. Йӱлымышт деч вара З.Прохоров лӱмеш колхозын пуымо ик типан пӧртшым шканже, икшывыже да уныкаже-шамычлан келшышым ыштен. Тыште кумда прихожият, газ котёлым шындымылан кӧра монча гай шокшо ванный пӧлемат, волгыдо да йоҥгыдо залат, шкешотан кухнят, пушкыдо ош плед дене леведме кумда кроватян малыме верат шӱм-чон шокшым, йӧратымашым пыштен келыштарыме улыт да Интернетыште темлыме дечат моторын койыт. Мончажат сауно гай: шокшышто шинчен ноет гын, монча ончыко лектын, кроватьыш возын каналтен, ӱстелтӧрыштӧ чайым йӱын кертат. Верандыште шылым, колым, пакасаскам жаритлаш, шӱрым, пловым шолташ лийме коҥга ончылнат шогылташ йӧн уло.

– Тудым, Пӧтъял гыч Виталий Коротковын кухньысо коҥгам оптымыжым ончен, Владислав эргым шке оптен, – манеш Валентина Арсентьевна. – Пеш йӧнан, поснак кеҥежым.

Ялыште илет, сурт-печым кучет гын, паша нигунам ок пыте. Валентина Арсентьевнат шушаш кеҥежым гараж ден сарайым урем капка деке лишкырак кусараш шона. Тыгеже клумбыжлан эше ик верым ойыра, а сурт-печыжым эшеат йӧнаным ышта.

Кумданрак — «Марий Эл» газетын
2018 ий 6 февральыште лекше номерыштыже лудын кертыда.

Маргарита ИВАНОВА.

Опубликовать в Одноклассники

Добавить комментарий