ОБРАЗОВАНИЙ

Ӱдыр-рвезе-влакым ушен

19 майыште Йошкар-Олаште йоча толкынын фестивальже эртен. Тудо Пионерийын 95 ияш лӱмгечыжлан пӧлеклалтын. Мероприятий республикысе «Юнармий» военно-патриотический, «Шочмо Марий кундемем» турист да краеведений толкынлам, школ лесничестве-влакым, «Жапын штурманже-шамыч» дружиным, «Шонанпыл» ден « Эр вий» йоча организацийлаш пурышо пионер-влакым чумырен.

Ты кечын рӱдоласе В.И.Ленин лӱмеш площадь тӱрлӧ тӱс дене «чиялген». Кызытсе пионер-шамыч оҥышкышт йошкар, ужар, нарынче, Российын флагше тӱсан галстукым пидыныт. А барабаным перкалыше-влак путырак ӧрыктареныт да куандареныт. Нуно мотор формышт дене пайремым поснак сӧрастареныт, а семӱзгарын йӱкшӧ совет жапыш пӧртылтеныт.

Пионер толкынын ветеранже, кугурак вожатый-влак ӱдыр-рвезе-шамычым саламленыт да шкештат ик татлан самырык пагытыштым шарналтеныт. Умбакыжым чыланат тӱҥ площадь гыч Комсомольский урем дене Тӱвыра да каныме рӱдӧ паркыш ошкылыныт. Колонным вашлийше еҥ-влак нуным эн ончыч ӧрынрак, а вара куанен онченыт, илалшыракше шинчавӱдшымат ӱштылын.

Паркыште тӱрлӧ площадке пашам ыштен. Ик вере пионер мурым муреныт, вес вере тӱрлӧ калыкын куштымашыжым тунемыныт. Мутлан, Оршанке район «Шонанпыл» ансамбльыш коштшо ӱдыр-влак Ирина Япаева ден Марина Павлова чылаштым финн полькым да артюковский коломейкым кушташ ӱжыныт.

 Кумшо площадкыште мотоциклын кузе ышталтмыжым пален налаш, радиоуправляемый самолет, машина дене пайдаланаш йӧн лийын. Модаш кумылан-шамычын кумылыштымат ӧрдыжеш коден огытыл. Тушто « 9 кӱ», «Чаҥа ден пӧрткайык», эсогыл марий калыкын мондалт толшо «Пу паҥга» модышыштат вийым тергаш лийын. Спорт дене кылым кучышымат монден огытыл: ӱдыр-рвезе-влак эстафетыште ӱчашеныт.

Тыгак Марий Элыште пионер толкынын шочмыжо, вияҥмыж нерген каласкалыше экспозицият пашам ыштен. Тудым  Йошкар-Оласе 14-ше №-ан гимназийын тунемшыже-шамыч ямдыленыт. А кеҥеж эстраде аланыште барабаным шоктышо-влак таҥасеныт. Тушто усталыкым 10 команде ончыктен. Кумшо верым Медведево район Цибикнур школын ӱдыр-рвезыже-влак налыныт. Кокымшо вер Марий Турек район Сысоево школлан логалын. Сеҥышыш Оршанке районын «Бум» командыже лектын.

Пайрем годым «полевой кухнят»  пашам ыштен. Йоча-влакым тутло пучымыш дене сийленыт да тамле чайым йӱктеныт. Мероприятий Воин чап монумент воктене мучашлалтын. Тудын йыр чумырген, ӱдыр-рвезе-влак икмыняр кугу йырым ыштеныт, икте-весын вачым кучен, пионер мурым йоҥгалтареныт.

Л.ШАБДАРОВА.

М.Скобелевын фотожо.

Снимкыште: Медведево район 3-шо №-ан школын барабаным шоктышо ӱдыржӧ-влакын вургемышт шукыштын кумылыштым савырен.

Опубликовать в Одноклассники

Добавить комментарий