Тылат, салтак
Ӧрдыжеш огыт код
Марий Элым вуйлатыше Юрий Зайцев совещанийым эртарен. Тушто военный специальный операций эртыме кумдыкыш гуманитар полышым колтымо нерген каҥашеныт.
Регион вуйлатыше военнослужащий-шамычлан шке кумылын гуманитар полышым чумырышо еҥ-влаклан таум ыштен. Боец-влаклан миен шуын але укем тудо шкеак терга, манын палемден. Элнам СВО-што аралыше землякна-шамычлан палемдыме верыш жапыштыже да писын намиен шуктымо нерген ойлен.
– Эн ончыч шке кумылын СВО кумдыкыш намиен шуктышо, патриотический порысшым шуктышо-влаклан тауштем. Мый декем мемнан боец-влак йодыш дене лектыт, нунын дене кутырем, мо кӱлеш нерген пален налам. Тӱҥжӧ: задачым шуктышо мемнан воинна-влак кӱлеш полышым налышт, – манын Юрий Зайцев.
Марий Эл гыч гуманитар полышым эреак колтат. Тушко мер ушем, предприниматель, политический партийын еҥышт, тӱрлӧ ийготан тыглай граждан-шамыч ушнат.
Тыгай кокла гыч иктыжым палемдыман. Тиде – Кужэҥэр район гыч Людмила Хлыстик. Тудын Сергей пелашыже – боевой действийын участникше, Кужеҥэр районсо «Боевое братство» отделенийын вуйлатышыже. Людмила шкеже «Единство» благотворительный фондым вуйлата, Белгород, Херсон областьлаш, ДНР-ыш, ЛНР-ыш гуманитар полышым колтымашке ушнен. Погымо полышым Сергей Хлыстик боец-влаклан шкеак намиен пуа. Тылеч посна ты еш военнослужащийын ешышт, йоча пӧрт, ДНР-ысе госпиталь-влаклан полша. Благотворительный концертым эртара. Тудыжым военный специальный операцийыште улшо салтак-шамычын кумылыштым нӧлталаш ыштат.
Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен.