Йот граждан-шамычлан у коронавирус инфекций деч прививкым ышташ тӱҥалыныт.
Республикыштына COVID-19 дене кылдалтше сӱрет ончычсо семынак моткоч начар. Таче стационарлаште коронавирусан пациент-влаклан медицине полышым пуымо 1030 койко пашам ышта, ты чот гыч 80 процент ужашыштыже черле-шамыч кият. Кечыште 50-100 еҥым эмлалташ пыштат. 134 еҥ – неле состоянийыште, 41 пациент шодым искусственно вентилироватлыме йӧн дене шӱла.
COVID-19 дене кучедалме деч посна черланыме дечат мероприятий-влак эртаралтыт. 20 сентябрь йотке у коронавирус инфекций деч 177 тӱжем утла еҥ прививкым ыштыктен.
– Вакцинаций обязательный медицине страхований полис дене яра эртаралтеш, – рашемда регионын тазалыкым аралыме министржын алмаштышыже Юлиана Зейтулаева. – Кызыт медицине организаций-влак йот граждан-шамычлан – студент ден пашам ыштыше мигрант-влаклан – прививкым ышташ «Спутник Лайт» вакцинын 2000 дозыжым налыныт. Вакцинаций граждан-шамыч але нунын пашам пуышышт кӱшеш оксала эртаралтеш.
Йошкар-Олаште йот граждан-шамычлан прививкым чыла поликлиникыште ыштат. Вакцинироватлалташ тарваныше-шамычлан регистратурыш гына мийыман.
М.ИВАНОВА
