2018 ий 3 декабрьыште физический лица-влакын 2017 ийлан пого, мланде да транспорт налогым тӱлымӧ жапышт эрта.
2017 ийлан бюджетыш 752 млн.теҥгем тӱлаш ыштыме, тышечын 80 процентше – транспорт налог.
Таче кечылан республикын бюджетышкыже 448 млн. теҥге транспорт налог пурен, тидыже ӱмашсе тыгаяк жап дене таҥастарымаште 20 процентлан, але 75 млн. теҥгелан, шукырак. Тыгодым физический лица-шамыч деч пурышо налог 18 процентлан, але 53 млн. теҥгелан, кугемын.
2018 ий 20 ноябрьлан физический лица-влак бюджетыш 300 млн. теҥге налогым але 2018 ий 3 декабрьлан тӱлаш палемдыме суммын пелыжым пуртеныт.
Республикыштына автомашинам виктараш йӧратыше-влакын кушкын толшо чотыштат куандарыде огеш кодо – 2017 ийыште 800 еҥ машинан лийын. Но налогым тӱлымӧ обязанностьым шуктыдымо-влакат улыт. Таче кечылан 45 тӱжем наре физический лицан транспорт налог шотышто 150 млн. теҥге кугыт парымже уло. А вет лачшымак налог оксан кугытшо дене регионысо да верласе бюджет-влакым чумырымо, тыгак кӱлешан социальный программе-шамычым илышыш пуртымо паша-шамыч кылдалтыныт.
Жапыштыже тӱлыдымӧ налог парымлан шотлалтеш, сандене тудын чумыргымыж годым налог орган-влак виеш поген налме мер-влакым ышташ праван улыт, мутлан:
— налогым физический лицан погыж кӱшеш налме шотышто йодмашым судыш пуэн кертыт, тыгодым парыман еҥлан эше судын пашажлан кугыжаныш пошлиным тӱлашыже логалеш ;
— суд актым Суд пристав-влакын федеральный службышкышт колтен, тӱлышаш суммын кугытшо гыч 7 процент, но 1000 теҥге деч шагал огыл исполнительный сборым налын сеҥат;
— парыман гражданинлан Россий Федерацийын чекше гыч лекташ чарен кертыт;
— парыман еҥын погыжым арестоватлен сеҥат.
Парымын 10 тӱжем теҥге деч шуко погынымыж годым гражданинлан Российын чекше гыч лекташ чарак ышталтеш. Тыге, тений 10 тылзыште республикысе налог орган-влакын ходатайствышт почеш, суд пристав-шамычын службышт тидын шотышто 369 пунчалым луктын.
Палемдыме деч уто роскот ынже лий манын, налогым лучо жапыштыже – 3 декабрь марте – тӱлаш да ласкан илаш.
Иктаж амаллан кӧра налог уведомлений толын огыл гын, тудым чыла налог инспекцийыште але шуко функциян рӱдерын «Мои документы» пӧлкаштыже паспортым ончыктен налаш лиеш.
Тыгак 29-30 ноябрьыште Марий Эл Республикысе чыла налог инспекцийыште пого налогым тӱлымылан пӧлеклалтше Почмо омса кече эртаралтеш. А Йошкар-Оласе инспекцийыш толшо-шамычлан банк картлан налогым тӱлаш йӧн лиеш.
М.ИВАНОВА.
