Зоя Висвисын (Тимофееван) лӱмжӧ марий поэзийыште у огыл. Чынрак каласаш гын, йоҥгалтмыже эшеат кумдарак, тыге «Путь мой – млечный» почеламут сборникше (2006 ий, Г.Пирогов кусарен) руш поэзий аланын ик улак вержым айлен, а Таллинныште эстон йылмышке кусарыме почеламутшо-влак родо-тукым калык-влакын сылнымут аршашыштым пойдарат. Тачысе юбилярна – куд книган авторжо, тышеч иктыже – «Кушто улат, мамык кумылан аваем?» (2001 ий) ойлымаш-влак сборник.
З.А.Тимофеева – дипломжо почеш туныктышо, Н.К.Крупская лӱмеш МГПИ-м руш йылме да литератур дене туныктышо специальность дене тунем пытарен, ик жап йочасадыште ыштен, творческий кумылан улмыжым пален налыныт да ик заводын тӱшкагудыштыжо воспитательлан паша верым темленыт. Калыкмутысо «у семын ӱштшӧ ӱштервоштыр семынет», самырык воспитатель пашажым у семын виктарен колтен: тӱшкагудышто вашлиймашке марий писатель-влакым: Геннадий Пироговым, Геннадий Сабанцевым, Вячеслав Абукаевым да молымат, вара мурызо-влакым, тунам ӱдыр-влакын чоныштым йӱлалтарыше Анатолий Куклин шӱдыр семын «чӱкталтын» – вашлиймашке ӱжаш тӱҥалын. Тыге шкежат тунам эше шыташ гына тӱҥалше у шӱлышан марий интеллигенций дене палыме лийын. Зоян почеламутым возкалымыжым пален налмекышт, нунышт редакцийыш пашаш ӱжыныт. Тыге умбакыже паша корныжо журналистике дене кылдалтын. 1996 ий гыч тӱҥалын 2005 ий марте «Кугарня» газетыште корреспондент-обозреватель лийын.
Журналист шотышто… Зоя Тимофеева-Висвисын изи годсыж гыч ик шарнымаш пеш оҥайын чучо.
– Икана Рита акам йодеш: «Тый кӧ лияш шонет? Журналистлан кай!» – манеш. Мыйже ӧрын, шинчам пашкартен шогалынам, кузе журналист лийман, вет эсогыл мутшымат ом пале, ялысе школышто тунам утларакшым почтальонын, библиотекарьын, туныктышын профессийже нерген ойленыт. «На тылат микрофон, – акам пареҥге немырым шурен шогымо изи ӱшым мылам шуялта, – журналист улат пуйто, интервьюм налат лийже», – манеш. Илен-толын, журналистет лийым, – воштылеш Зоя.
Кодшо курымын 90-ше ийлаштыже «Кугарня» газет редакцийыш логалше-влак кызытат ты газетлан таум ыштен илат. Тунам «Кугарня» шке йырже у семын шонышо, у семын возышо, чон йӱлен илыше да пашам ыштыше уста самырык еҥ-влакым чумырен. Зоя Александровнат ту жапым эн волгыдо да эн пиалан пагыт семын шарна. Тыштак бизнес паша деке лишемын.
– Рушла лекше газет-влакым лаштыклен шинчышемла, шкенан газет дене таҥастарем, икана планёркышто ойлем: «Молан мемнан рекламе уке?» Тӱҥ редактор Иван Иванович Алексеев ыле. Мыланем ыштен ончаш темлыш. Рекламым кычалаш пижым, икыт-кокыт савыкталтеш, вес ганалан ешаралтеш, пел полоса денат погына, кунамже тичмаш страницат лектеда. Мыланем тиде паша келшаш тӱҥале. Тидын годымак статьялам возенам, йоча-влаклан «Ужар лышташ» лаштыкым ямдыленам.
– Туге гынат, Зоя, индеш ий ыштымек, тый «Кугарня» деч ойырлен каенат. Шкендын коммерций сынан газететым лукташ тӱҥалынат. Амалже могай?
Л.СЕМЕНОВАН тичмаш материалжым 2021 ий 31 августышто лекше «Марий Эл» газетыште лудса.
