СПОРТ

Юл кундемыште мардеж гай писе

Юл кундемыште  мардеж гай писе

Куштылго атлетике дене РФ-ын телымсе первенствыжын призержо Кирилл Семенов юниор-влак коклаште Казаньыште  эртыше Юл кундем федеральный округын первенствыштыже 800 метрым кужталмаште икымше верым налын.

Рвезым Марий Элысе олимпийский резерв училищын туныктышыжо Константин Лукьянов тренироватла. Кирилл ты дистанцийыште 1 минутат 53,24 секундым ончыктен. Спортсменна кругат пелым Пермь кундемын рвезыж почеш куржын, вара ончыко лектын да финиш марте икымше лийын.

Ты результатше дене тудо республикнан чемпионатыштыже сеҥыме жапшым кок секундлан саемден. Тренер Кириллым да эше ик воспитанникше Илья Щербаковым эн ончыч 20-22 июньышто Саранскыште лийшаш соревнованийыш, варажым Российысе юниорский первенствыш наҥгаяш шона. Тудо 1-3 июльышто Калуга олаште эрта.

Снимкыште: Кирилл Семенов — шола гыч икымше.

Л.ШАБДАРОВА.

Опубликовать в Одноклассники

Добавить комментарий