СПОРТ

Юж гимнаст-влаклан – чапле йӧн

30 октябрьыште Звенигово оласе Лицей кундемыште ГТО нормым сдатлаш келшыше изирак спорт площадкым почыныт. Тудым «Демографий» национальный проектын «Спорт – илышын нормыжо» федеральный проектшын кышкарыште тунемше-шамычым веле огыл, тыгак чумыр калыкым – изи йоча гыч тӱҥалын илалше еҥ марте – физкультур ден спортлан, тӱшка спортлан кумылаҥдыме шонымаш дене чоҥымо. Торжественный мероприятийыш Марий Эл правительствым вуйлатышын икымше алмаштышыже Михаил Васютин, молодёжный политике, спорт да туризм министр Лидия Батюкова, Звенигово район администрацийым вуйлатыше Владимир Геронтьев да молат миеныт.

– «Демографий» национальный проект айдемын илыш корнысо кажне йыжыҥжым авалта, манаш лиеш. Тиде спорт площадке – Звенигово олаште илыше калыклан чапле пӧлек. Тудо спорт дене профессионально кылым кучышо-шамычлан веле огыл, чылалан – самырык-влакланат, кугурак тукымланат – палемдалтын. Марий Элын правительствыже, Марий Элым вуйлатыше Александр Евстифеевын лӱмышт дене чыладамат шушаш пайрем-влак дене шокшын саламлем. Порылыкым, улан илышым да пеҥгыде тазалыкым тыланем, – оласе калыкым саламлен Михаил Зиновьевич.

– «Демографий» национальный проектын «Спорт – илышын нормыжо» федеральный проектше – амбициозный проект, тудо шке ончыланже пеш кӱкшӧ цельым шында. Тыгай чапле площадкым почмо дене спорт кажне еҥым, кажне ешым авалта манын ӱшаныме шуэш. Адакше тыште шкем спортын у видыштыже – юж гимнастикыште – тергаш йӧн уло. Тиде – пеш модный воркаут. Спортын тиде видшым вияҥдашлан тыште тренажёр-влак кызытеш ситышын улыт, – палемден Лидия Александровна.

Мероприятийыш шуко еҥ толын, но утларакше йоча-влак лийыныт. Спорт дене кылым кучышо ӱдыр-рвезе-влак комментаторын каласкалымыж почеш тренажёр-шамычын капкылын лачшымак могай чогашыл тӱшкажым вияҥдаш палемдалтмыштым ончыктеныт, сем почеш куштеныт.

Палемдыме проект кышкарыште Марий Элыште 2019-2021 ийлаште федеральный ден региональный бюджетлан пырля финансироватлымышт кӱшеш тыгай сынан спорт площадкым эше 11 районышто чоҥаш палемдыме, тений – куд районышто.

М.ИВАНОВА

Авторын фотожо

Опубликовать в Одноклассники

Добавить комментарий