СПОРТ

«Южо чыве шып гына муным мунча, а южыжо шуко кыдетла»

Инвалид-влакын III всероссийский кеҥеж спартакиадылан республикна ямде. Тидым Россий спорт министрын алмаштышыже Марина Томилова пеҥгыдемден. Тудо 10 июньышто кундемышкына толын каен. Амалжат лач  спартакиадылан ямдылыме спорт объектлам ончалме дене кылдалтын.

Марий Эл вуйлатыше А.Евстифеев дене М.Томилова спорт площадке-влакым  онченыт, ямде улмо-укем тергеныт. Тӱҥ шотышто таҥасымаш-влак «Дружба» стадионышто, «Марий Эл» ий полатыште, Вўд спорт полатыште эртат. Рӱдӧ стадион воктене улшо тӱшкагудын тӱжвал тӱсшым вашталташ, уэмдаш манын палемденыт, южо вере кырча-марча пашам писынрак мучашлаш кӱштеныт.

Спорт сооруженийла эше чылт ямде огытыл гынат, Марина Владимировналан верысе-влакын кыртмен тыршымышт келшен.

А.Евстифеев тудлан мероприятийым торжественно почмаш ден петырымаш годым пайрем программым видеоэкран ден ончыкташ тӱҥалме нергенат радамлын каласкален.    

Варажым чыланат совещанийыш чумыргеныт. Марий Эл вуйлатыше спатртакиадылан ямдылалтме шотышто кажне арнян ты йодышым тарватыме нерген ойлен да Россий спорт министрын алмаштышылан ты йодышым каҥашымаште лиймыжлан тауштен.

– Уна-влак 9-10 кече лийыт, лач тынар жап спартакиаде шуйна. Республиклан тиде – шкешотан чап, вет мемнан дене федерал средствым кучылтын чоҥымо спорт объектла ситат да тачысе саманлан келшыше улыт. Сандене нуным яра шогыктыман огыл. Таҥасымашлам эртараш республикнам ойырен налмылан спорт министр Павел Анатольевич Колобковлан мемнан лӱм дене тау мутнам каласыза. Мероприятий сайын эртыже манын, ме чыла йӧным ышташ ямде улына, – совещанийыш толшо-влакым саламлен, мане А.Евстифеев.

Тушто тыгак тыгай спартакиадым эртарыме кадр йодышымат решатлаш полша манын пеҥгыдемденыт, вет чолга самырык еҥ-влак варажым паша верым мушаш улыт. Спорт пайремышке чыла муниципал район ушнышаш. Совещанийыште транспорт шотыштат йодышым нєлталыныт. Автомобильный инспекцийлаште тыршыше-влаклан, корнышто нимогай чарак, ДТП ынже лий манын, кугу тӱткышым ойыраш кўштеныт.    Волонтёр-шамычын полышышт, ола уремым сӧрастарыме нергенат мутланеныт. Тыгак уна-влакым вузласе тўшкагудеш вераҥдарыме, нунылан чыла шотыштат йӧнан лийже манын, мобильность йӧным кучылташ темленыт.

Шуко спортсмен-инвалид дене пырля ача-аваштат, родо-тукымыштат толыт. Сандене нуныланат канаш, жапым пайдалын эртараш мероприятий-влак  палемдалтыныт. Весымат каласыман: унагудылаште илаш тӱлымӧ ак февраль тылзе деч шерге лийшаш огыл. Мутат уке, мўндыр кундем гыч толшылан самолёт дене чоҥешташ йӧным ыштат, вет ты форумым элнан президентше В.Путин поддерживатла.

– Россий спорт министерстве лўм дене пеш кугу тау. Шижалтеш, чылажымат профессонально ыштеда. Проект тыршымаш дене кылдалтын.  Тудын тӱҥалмешкыже тылзе наре жап кодеш. Вет «Южо чыве шып гына муным мунча, а южыжо шуко кыдетла», – койдарчык йӧре шыргыжалын  мане М.Томилова. – Самырык-влакланат усталыкым, чолгалыкым ончыкташ – путырак сай йӧн. Ты мероприятий календарный план почеш «Спорт – илышын нормыжо» федерал проектыш пурталтын. Сандене тиде спартакиадылан кугу тўткышым ойырат. Тыге лектеш: президентын ме «Демографий» нацпроект дене кылдалтше указшым шуктена. Таче кечылан 61 регион гыч йодмаш пурен. Спартакиаде почылтмеш, тылзе наре кече кодын. Моло регион дене таҥастарымаште спортым вияҥдыме шотышто Марий Эл палынак ойыртемалтеш. Тыште илыше-влак кокла гыч 42 процентше спорт дене пеҥгыде кылым куча. 2020 ийлан пўтынь элыштына  тыгай кӱкшытыш шуаш сай ыле.

Спартакиадылан ямдылалтме нерген тыгак Марий Элын молодёжный политике, спорт да туризм министр Л.Батюкова, МВД-ште, МЧС-ыште, национальный гвардийын войскаштыже тыршыше, вузласе ректор-влак ойленыт.

– Спартакиаде республиклан кугу событий лиеш. Сандене тудо уна-шамычлан сай шарнымашым кодышаш. Тышеч кажныже мӧҥгыжӧ пӧлек дене пӧртылшаш. Эн ончыч весела кумыл, сай результат, чыла велым шуаралташ шонымаш дене кайышаш улыт, – совещаний мучашлан иктешлен  мане А.Евстифеев.

Е.ЭШКИНИНА.   

Опубликовать в Одноклассники

Добавить комментарий