Курыкмарий районыш мийымыж годым Александр Евстифеев Козьмодемьянск олаште лийын.
Олан мэрже Михаил Козлов республик вуйлатышын пашажым шуктышылан рӱдӧ ужашыште улшо яра верлаште, мутлан, пужымо тошто пӧрт-влак олмышто, мом ышташ лийме шотышто кызыт еҥ-влак деч йодыштмашым эртарыме нерген каласкален.
Козьмодемьянскыште А.Евстифеев Юл эҥер серым да олан историй ужашыжым ончен савырнен. Тудо мэрла тӱткышым муниципал погым арален кодаш, оласе казнам пойдарышашлан базым ышташ ойыраш кӱлмылан палемден.
— Зданий-влакым ужалаш лиеш. Тиде – проста паша. А кузе те бюджетым чумыраш тӱҥалыда? Тендан тӱҥ задачыда – тугай объект-влакым муаш да ышташ, кудышт олалан кажне кечын пашам ышташ тӱҥалыт, — палемден республик вуйлатышын пашажым шуктышо.
Козьмодемьянскын эҥер серже – олан ик эн сылне да верысе калыкын кугешныме верже. А ончыкыжым тудым турист-влакым кумылаҥдыме, уна ден тыште илыше-влакын каныме верыштым ышташ шонат. Тидлан серым шотыш кондаш да тӱзаташ палемдат.
— Туризмст направлений шотышто ме тыршен пашам ыштена. Тылеч ончычсо ийлаште дамбым, моло сооруженийым технически да капитальнр олмыктымо. Пытартыш жапыште изи бизнесым, серым вияҥдыме, унагудо комплекс, кемпинг шотышто проект-влак каҥашалтыт. Кызыт мемнан ик унагудына гына уло. Тудыжат олан кӱшыл ужашыштыже верланен. Мутат уке, ӱлыл ужашыштат, Юл деке лишкырак, кӱлеш. Сандене ме унагудо комплексым почмо шотышто йодыш дене пашам ыштена, — каласен М.Козлов.
А.Евстифеев Юл эҥер сер кумдыкым ончен савырнен, тудын могай улмыжым аклен да администраций пашаеҥ-влаклан икмыняр кӱштымашым пуэн.
— Россий премьер-министр Юл эҥер серыште верланыше субъект-влаклан шукерте огыл кугу совещанийым эртарыш. Тушто эҥерым эрыкташ, перегаш кӱлмӧ, быт да промышленный отходым тушко кышкымым чарнышаш нерген ойлалте. Нине пашам шуктышашлан 245 миллиард утла теҥге федеральный окса ойыралтшаш. Программе 2020-2025 ийлаште пашам ышташ тӱҥалеш. Мемнан республикат Юл эҥер серыштак верланен, — ойлен республик вуйлатышын пашажым шуктышо да паша йыжыҥын ышталташ тӱҥалеш манын палемлен. Тудо эҥерым, серым эрыкташ, инфраструктурым, унагудо комплексым ышташ, турист-влакым тышан кодаш кумылаҥдаш кӱлмӧ нерген каласен.
Козьмодемьянскыш мийымыж годым А.Евстифеев верысе автовокзалын пашаж дене палыме лийын. Автостанцийын ончыкылыкшо окса ситыдыме дене кылдалтын. Республик вуйлатышын пашажым шуктышо ден олан мэрже тудлан полшымо да муниципал собственностьыш пӧртылтымӧ дене кылдалтше йодыш-влакым каҥашеныт. Тыгак олаште общественный транспортын пашам ыштымыже да тиде отрасльым вияҥдыме нерген мутланеныт.
* * *
Волжский районышто лиймыж годым А.Евстифеев Волжск оласе 5-ше номеран школын кокымшо тунемме корпусыштыжо чоҥымо паша кузе кайымым ончал савырнен.
Тыште тудо Россий Образований да науко министерствын департаментшын директоржын алмаштышыже Дмитрий Иванов дене пырля лийын.
У школ 500 утла тунемшылан келыштаралтеш. Тудын пелен кок дошкольный группо лийыт. Республик вуйлатышын пашажым шуктышо уналан Марий Элын йодмашыжым поддержатлаш федеральный правительствыш лекмыж нерген каласен да тиде йодышым рашемдыме годым Дмитрий Ивановым шкенжымат полшаш йодын.
Школын икымше черетшым пашаш колтымо. Тушто тӱҥалтыш класс-влаклан тунемме корпус ден школ деч ончычсо группо-влаклан вер, медицине блок, кочмывер улыт. Тудо чылаже 228 йочалан келыштаралтын.
Кокымшо черетын тунемме корпусыштыжо 336 икшывылан вер лиеш. Тушто лудмывер, спортивный да актовый зал-влак верланат.
Республикысе Образований да науко министерствын палдарымыж почеш, тиде школ Россий Федерацийысе субъект-влакын кугыжаныш программыштым ойырен налме шотышто йодмашыш пурталтын. Тудын дене келшышын, регион-влаклан федеральный бюджет гыч субсидий ойыралтеш.
Пытартышлан А.Евстифеев 5-ше номеран школын директоржо дене мутланен, коллективым Шинчымаш кече, у тунеммме ий тӱҥалме дене саламлен да тунемше-влаклан сеҥымашыш шуаш тыланен.
Тиде кечынак А.Евстифеев Волжск олаште Шевченко уремысе корнын ик ужашыжым ончен савырнен. Тудым кугыжаныш-частный партнерство йӧн дене волгалтарыме.
Л.Камалетдинова.
