Марий Элыште у коронавирус инфекций дене кылдалтше ситуаций ончычсо гаяк неле. Республикнан 10 инфекционный больницышкыже эмлалташ пыштыме COVID-19 да пневмоний черан пациент-влакын чотышт сутка еда кугеммылан кӧра пытартыш кок кечыште ковидный манме эше 60 койкым ешарыме.
26 октябрьыште Звенигово районысо рӱдӧ больницыште эше 20 койкым коронавирусан пациент-влаклан медицине полышым пуаш келыштарыме. Тиде эмлымверыште ынде тыгай профилян чылаже 70 койко уло. Советский районысо рӱдӧ больницыштат 80 койкан ковидный отделенийыште эше 10 черлылан верым ыштыме.
27 октябрьыште Волжск оласе рӱдӧ больницыште коронавирусан черле-влакым эмлаш эше 30 койкым ешарыме. Кызыт тыште ковидный манме чылаже 150 койко уло.
27 октябрь эрдене Йошкар-Оласе больницын 240 койкан инфекционный стационарыштыже 228 пациент эмлалтын, ты чот гыч 5 черле шодым искусственно вентилироватлыме йӧн дене шӱлен, 74 еҥлан кислород кӱлын.
Медведево районысо рӱдӧ больницыштат чыла гаяк койкым айлыме лийын, тыштат 5 пациент шодым искусственно вентилирватлыме йӧн дене шӱлен.
Сар-влакын ветераныштын республикысе клинический госпитальыштышт 135 гыч 127 койкыштыжо коронавирусан да пневмониян черле-влак эмлалтыныт, 59 пациент неле состоянийыште, 4 еҥ шодым искусственно вентилироватлыме йӧн дене шӱлен.
27 октябрь эрдене регионнан 10 инфекционный стационарыштыже чылаже 1001 граждан (тынар черле эше лийын огыл!) у коронавирус инфекций да пневмоний деч эмлалтын. Ты чот гыч 21 пациент шодым искусственно вентилироватлыме йӧн дене шӱлен, 407 черлылан кислород кӱлын.
М.ИВАНОВА
