ВКонтакте социальный кылысе «Коронавирус. Марий Эл Республикын оперативный штабше» группын палдарымыж гыч, таче, 16 апрельыште, у коронавирус инфекций дене авалталтме эше 29 у случайым регистрироватлыме. Тыге, республикыштына тиде кече марте COVID-2019 дене чылаже 147 еҥ черланен, 12 пациент паремын да икте колен.
Пытартыш суткаште рашемдыме чыла случай тымарте черланыше-влак дене кылым кучымо дене кылдалтын.
Роспотребнадзорын Марий Элысе виктемжын увертарымыж почеш, 884 еҥым, ты шотыштак у коронавирус инфекций дене авалталтын кертше-влак дене кылым кучышо 830 гражданым, медицине велым эскерат. Учёт гыч 2551 еҥым, ты шотыштак 53 йот гражданым, кораҥдыме.
Республикысе Гигиене да эпидемиологий рӱдерын, СПИД-рӱдерын лабораторийлаштышт коронавируслан тергаш тӱҥалме жап гыч 16 апрель марте чылаже 9656 шымлымашым эртарыме.
М.ИВАНОВА
