«Стопкоронавирус: статистика» сайтын 10 июльысо данныйже почеш, Марий Эыште COVID-19 деч чылаже 26 еҥ колен, ты чот гыч коктынжо –пытартыш суткаште.
Тазалыкым аралыме министрын алмаштышыже Татьяна Бастракован палемдымыж гыч, коктынат Марий Турек районысо рӱдӧ больницын инфекционный отделенийыштыже эмлалтыныт. У коронавирус инфекций деч 60 ий деч кугурак ӱдырамашат, 70 ий деч кугурак пӧръеҥат чот орланеныт. Тылеч посна когыньыштынат шӱм-вӱргорно дене кылдалтше неле черышт, шодым кумдан авалтыше пневмоний лийыныт.
Тӱҥ налмаште, у коронавирус инфекций дене черланыше пациент-влак илыш гыч тазалыкыштышт серьёзный ситыдымаш улмо годым каят. COVID-19 дене черланымыж деч ончыч пациент таза да самырык лийын гын, тудо осал инфекцийым 99,9 процент случайыште сеҥен кертеш.
Марий Элын Тазалыкым аралыме министерствыжын 10 июль эрдене увертарымыж почеш, пытартыш суткаште республикнан инфекционный стационарлаж гыч 73 пациентым мӧҥгӧ колтымо, тыгодымак 56 черлым эмлалташ пыштыме. Кызыт стационарыште чылаже 619 еҥ кия. Ты чот гыч 210 пациентлан «COVID-19» диагнозым шындыме, 138 черле неле состоянийыште, 11 еҥ шодым искусственно вентилироватлыме йӧн дене шӱла, 246 пациентлан кислород кӱлеш.
Аралыза шкендам да лишыл еҥда-влакым!
М.ИВАНОВА
