Марий рӱдолаштына Марий Элын 100 ияш лӱмгечыжлан пӧлеклалтше стеллым шогалтат.
У шарныктышым индешымше микрорайонышто, Йыван Кырля уремыште, «Планета» ужалыме рӱдер шеҥгеке вераҥдат. Госзакупко сайтын увертарымыж почеш, ты пашалан 1,4 миллион тенге ойыралтеш. Шарныктышым шогалтыме дене пырля ужалыме рӱдер да Христосын шочмыжлан черке кокласе кумдыкым тӱзатат, газоным ыштат.
Ончылгоч палемдыме почеш, стелла 8 элемент гыч шогаш тӱҥалеш. Нуно марий орнамент символым «чумырат». Негызше кум кӱртньӧ-бетон ромб гыч лиеш. А композиций ончылно шарнымашан табличкым вераҥдат. Тушко марий автономийым ыштыме нерген постановленийым пижыктат.
Памятникын композицийже марий кӱсотым ушештараш тӱҥалеш. 20 июль марте тудым ыштен шуктышаш улыт.
С.Носова
