УВЕР ЙОГЫН

«Эх, Акпатыр»…

«Марий Эл» газетыште Гельсий Зайниевын савыктыме материалже-влакым коклан лудам. Тудо эрыкан полётышто улшо лётчик-ас гай: тичмаш бак да тичмаш боекомплект дене кушко шона, тушко «чоҥештылеш», утларакшым шкенан-влакым волтен шуаш йӧрата.

17 январьыште лекше газетыште «Акпатыр» опер нерген возымыжо вашмутым пуаш таратыш. Воза тудо мом ужын-колын, мо нерген лудын, мом пала да мом палем манын шона. Тӱрлӧ журналистын «Акпатыр» нерген возымыжым тӧрлатылеш да тыгодымак шкежат йоҥылышым ыштылеш, тичмаш уверым огеш пу. Мутлан, 1992 ийыште Г.Таныгин дирижёр-постановщик лийын, 2011 ийысе постановкышто Акпатырын партийжым В.Шапкинын веҥыже баритон Александр Вахромеев сайын мурен. А Носковын партийжым кужу жап мурышо марий бас А.Беляев нерген ик мутат уке, пуйто тудым огешат пале. Василий Ялпаев солист-вокалист огыл, тудо – балетысе пенсионер.

«Марий солист-влак ӱлык «волен каеныт», «Акпатырыште» тӱҥ рольым тетла огыт муро» манын возымыжо мыйым изиш сырыкта. Гельсий Зайниевич, нине солист-влак ынде сулен налме канышыште улыт. А.Беляев ден Л.Бочкарёва театрыштат пашам огыт ыште. 1990-2000 ийлаште театрыште вӱдышӧ партийлаште тазан пашам ыштыше солист-влакым тыге койдараш келшен огеш тол. Теве нунын фамилийышт: Е.Романов, ВСозонов, С.Сушкина, Л.Бочкарёва, О.Логинов, А.Беляев, Е.Розов. Нуно «Акпатыр» оперын эн кужун кайыше 1992 ийысе постановкын артистше-влак улыт. Нунак «Алдиар» оперын тӱҥ солистшылан шотлалтыт. Тиде веле мо? «Евгений Онегин» спектакльыште чыла тӱҥ партийым марий артист-влак муреныт: Онегиным — В.Созонов, Татьянам — Л.Бочкарёва, Ольгам — С.Сушкина, Лексийым — О.Логинов, Греминым — А.Беляев… Опер мурызын «ӱмыржӧ» мучашдыме огыл. Кажне рольлан ийгот денат келшен толман, вет Акпатыр шоҥго разбойник лийшаш огыл. Тиде рольым Венедиктов 50 ий марте, мый 51 ий марте муренам.

А кызыт театрыште 5 самырык  марий солист уло, но кумытынжо марий йылмым огыт пале. Шоналташ гын, марий солистше-влак кӱлыт мо? Ийлан ик гана Килемар кундемыште «Акпатырым» ончыкташ? Кӱлешлыкшат уке, шонем. Театрыште тетла вес марий спектакльжат уке, концертлаштат марий муро огеш йоҥго! Но ончыкылык уло: витле ий гыч рушла ончыкталтше «Акпатыр» оперыште марий йылмым палыдыме марий солист-влак мураш тӱҥалыт, залыште марий йылмым мондышо марий зритель-влак вераҥыт, чыла тидым марий йылмым палыдыме дирижёр почеш марий йылмым мондышо  музыкант-влак сӧрастараш тӱҥалыт.

Вячеслав СОЗОНОВ,

Марий Элын калык артистше

Опубликовать в Одноклассники

Добавить комментарий