УВЕР ЙОГЫН

Эсогыл колышо вольыкым кышкат

Марий Элыште шӱкым кышкыме санкционироватлыдыме вер-влакын чотышт шотышто лидерлан Звенигово район шотлалтеш. Общероссийский калык фронтын еҥже-влак кундемым амыртыше-шамычым наказатлышашлан «преступлений» вер гыч фото ден видеофиксацийым ышташ темлат.

Районысо калык таче кечылан 26 тыгай верым палемден. Марий Элысе ОНФ-ын еҥже-влакын мутышт почеш, нуно шӱк деч эрыктыме, тыгак угыч шӱкаҥдыме кумдыклам икмыняр гана фиксироватленыт. Тиде уверым кучем мартеат шуктеныт, но сай вашталтыш садак лийын огыл. Калык дене пашам утларак вияҥдаш гын, ситуаций лишыл жапыште сай велыш вашталтеш, титакан-влак наказатлыме лийыт, шонат «фронтовик-влак».

Титакан-влакым мут кучаш шогалтыме денат сӱрет вашталтын кертеш, шонат ОНФ-ын экспертше-шамыч. Тидланже гражданиным шӱкым закондымын кышкымыж годым фотографироватлаш але видеош возен налаш кӱлеш. Айдеме раш ок кой гын, автомашинажын номержым фиксироватлаш лиеш. Вараже тиде материалым Росприродназорыш але пӱртӱсым аралыме прокуратурыш гына колташ кодеш. Чодырам шолып руышо, южым амыртыше да тыгай моло-влак денат тиде йӧн денак кучедалаш шотлан толеш.

Мут толмашеш, Марий Элыште прокуратур Параньгасе шӱкым кышкыме официальный полигонышто законым пудыртымым ик гана веле огыл рашемден. Тушко эсогыл колышо вольыкым конден кышкалыт да тидын дене чыла санитарный нормым пудыртат.

…Официальный полигонлаште шот уке гын, чодырасе да корно воктенысе кумдыклашке шӱкшакым кышкыме вер нерген ойлыманат огыл. Тудыжо ны калыклан, ны кучемлан огыт кӱл, пуйто чылажат тыгак лийшаш.

М.ИВАНОВА.

Опубликовать в Одноклассники

Добавить комментарий