Эрык деч поснат коден кертыт
УВЕР ЙОГЫН

Эрык деч поснат коден кертыт

Кодшо ийлаште чодырам руымо шотышто законодательствыш вашталтышым пуртымо сай лектышым пуэн, палемдат чодыра озанлык специалист-влак. Вет кызыт пушеҥгым руымо дене кылдалтше кажне сделке регистрироватлалтшаш да Рослесхозын сайтыштыже электорн йӧн дене декларироватлалтшаш.  Чодырам ямдылыме да тудым ужалыме дене кылдалтше сделкым учётыш налмаш ЕГАИС системыш пурталтеш, сандене эл мучко ты шотышто могай сӱрет улмо раш коеш.

Шукерте огыл Марий Эл Республикыште чодырам закондымын ямдылымым да руымым пытарыме шотышто комиссийын заседанийже эртен. Тудым ял озанлык да продовольствий министр А.Краснов вӱден. Чодыра да сонар озанлык министр Алексей Шургин ончыч чодырам оролымылан вуйын шогышо должностной лица-влакын переченьыштым кумдаҥдыме нерген увертарен. 2015 ий дене таҥастарымаште, кодшо ийын чодырам закондымын руымаш 16 процентлан, а окса эҥгек шотышто 45 процентлан  иземын.

2015 ийыште 142 тыгай случай лийын гын,  2016 ийыште 119 случайым тӱжваке лукмо. Шолыштмо 1,9 тӱжем кубометр чодыра деч эҥгек 14,8 миллион теҥгеш шуын.

МВД-ын Уголовный розыск управленийжын начальникше Д.Николаевын палемдымыже почеш, чодыра озанлык дене кылдалтше уголовный деламат шагалрак тарватыме. Теве пытартыш случай январьыште Волжский кундемыште лийын. Кок пӧръеҥ нимогай документ деч посна чодыраште шолып 3,07 кубометр кожым руэныт да трактор дене лукташ шоненыт. Но чодыра озанлык специалист-влаклан логалыныт. Осал пашашт дене «Алексеевский» лесничествылан 45058 теҥгеаш эҥгекым ыштеныт. Следствий кайыме жапыште тудым нуно пӧртылтеныт. Уголовный делам Волжскысо оласе суд ончаш тӱҥалеш. Уголовный законодательстве дене келышышын, ты преступленийлан шым ий марте эрык деч посна коден да 300-500 тӱжем теҥге штрафым тӱлаш пуэн кертыт.

     Тидын шотыштак пӱртӱсым аралыме межрайонный прокурор А.Киселев МВД-н чодыра озанлык дене кылдалтше правонарушений дене кучедалше пӧлкан сотрудникше-влакын полномочийыштым кугемдаш темлен.

Заседаний годым комиссийын тений шуктышаш паша планжымат каҥашеныт.

          С.Носова.

Опубликовать в Одноклассники