Сергей Федонинын «Поволжский треугольник» арт-проект ончерже 2010 ийыште шочын да кок ийлан ик гана лиеш. Тений тудо Национальный художественный галерейыште почылтын. Тушко тӱрлӧ кундемла гыч фотограф ден сӱретче-влак ушненыт. А 20-шо мартыште Йошкар-Олаште Моско ола гыч фотожурналист Павел Волков дене пайдале вашлиймаш эртен. Тудын у, шкешотан фотоончалтышыже.
Павел 1987 ийыште Нижний Тагил олаште шочын. Фотожурналистлан Сант-Петербургысо Юрий Гальперин лӱмеш фотофакультетыште, Голландийысе медиа школышто тунемын, ятыр ий Моско ден Санкт-Петербургысо фотоагентствылаште тырша, тӱнямбал кӱкшытан ончер-шамычын участникше да сеҥышыже лийын. Павел Волков фотоагенстве редакций-влакын заданийышт почеш Украиныште, Крымыште, Донецк олаште лийын. Ӱмаште октябрь тылзыште «Новая газета» газетын заданийже почеш, эстон телевиденийын кореспондентше-влак дене пырля Карабахыш миен.
Поснак Павел тӱрлӧ айдемым аралыше, гуманитарный фонд-влаклан фотом ышта. Пандемий годым «Феникс» фотосерийым ямдылен, тушто ик геройжо – 18 ияш Алексей. Бурятийыште шочын-кушшо рвезым да тудын изажым йӱшӧ ачашт коҥгаш кудалтен. Изаже йӱлен колен, а изи Ольош илыше кодын, но тулеш капше чот йӱлен, тудым Москош эмлаш колтеныт. Пиалешыже, рвезым ик медшӱжар ашнаш налын. Тӱрлӧ вере операцийым ыштеныт да, тыге тудо илыше кодын… А вес герой – тыгаяк чот йӱлышӧ чурийвылышан самырык Вика ӱдыр, тудым да Алексейым пырля войзен налын. Вес геройжо – Воронеж область Журавка ял гыч самырык ӱдырамаш, Аня, нунын гаяк йӱлышӧ чуриян. Павелым тудо инстаграмм гоч кычалын муын. Фотограф Анян ялышкыже миен да фото-влакым ыштен. Вес кечын пӧрт йӱлен. Вара самырык ӱдырамаш нерген интернетыште возеныт да, полшаш манын, оксам счетышко погеныт, ты окса дене пачерым налыныт. Тыге фотограф Анян ешыжлан полшен.
Мучашлан Павел сарыште лиймыж нерген каласкален. Тудо эрыкан фотограф семын Ереваныште доброволец-влакым сниматлен, вара Карабахысе ик эн кугу Степанакерт олаште.
– Кызытсе сар пеш шучко, – ойла тудо. – Индеш кечыште ме икмыняр гана обстрелыш логалынна. Мый лӱйкалыме татым каске да бронежилет деч посна «шокшо точкышто» армян калыкым фотопортрет гоч ончыктенам. Пеш тӱткӧ лийман, чыла фотом писын да сайын ыштыман, юватылаш да шонкалаш жап уке. Курык коклаште самолёт чоҥештылме дене артиллерийын лӱйкалыме йӱк ок шокто: калыкым у технологий полшымо дене пытарат. Санденак доброволец-влак автомат дене нимомат ыштен огыт керт. Кызытсе сарыште израиль ракете але турецкий дрон кушечын чоҥештен толеш от пале, но нуно тыйым кеч-могай жапыште пуштын кертыт. Садлан эре тыге шонем: сарзе-влак шке коклаштышт кредалышт, тыныс калыкым ынышт тӱкӧ, вет сар годым эн чот йоча, ӱдырамаш, илалше-влак орланат.
М.СКОБЕЛЕВ
Авторын да В.Павловын фотожо
