ТАЗАЛЫК

Эртыше идалыкын геройжо

Эртыше идалыкын геройжо
Лӱддымӧ врач – Лариса Бендер
Марий Элыште илыше-влакын йӱклымышт почеш, Йошкар-Оласе больницын тӱҥ врачшым алмаштыше Лариса Бендер эртыше идалыкын геройжо лийын.
«Эртыше идалыкын геройжо» — Российын 47 регионжо гыч лӱддымӧ школьник, врач, туныктышо, волонтёр, ветеран-влак нерген 250 утла историйым каласкалыше проект.
Проектыште Марий Эл гыч калыкын поснак пагалыме куд еҥже участвоватлен: Сергей Таныгин — 60 наре спектакльлан декорацийым ямдылыше уста художник, Лариса Бендер – Йошкар-Оласе больницын тӱҥ врачшым алмаштыше, у коронавирус инфекций дене черланыше-влаклан ик эн ончыч медицине полышым пуаш тӱҥалше специалист, Сергей Козин – Единый Российын Самырык гвардийжын еҥже, эм ден кочкышым кондыштарыше волонтёр, Иван Белоусов ден Денис Андреев – ДПС-ын пашаеҥже-шамыч, пожар гыч еҥ-влак ден сурт вольыкым утарымышт дене чапланеныт, Дмитрий Фурзиков – производствыштыжо шкем аралыме маскым ургышо да тудым волонтёр-влаклан яра пуышо самырык амалкалче.
Йӱклымаш Марий Эл правительствын «Одноклассники» да «ВКонтакте» социальный сетьласе пабликыштыже эртен. Калыклан 2020 ийын геройжым ойырен налаш куштылгыжак лийын огыл, вет тыгай лӱмым кажне кандидат сулен. «МГЕР» всероссийский мер-политике молодёжный партийын регионысо штабшым вуйлатыше Матвей Галяутдиновын мутшо почеш, эн шуко йӱкым Лариса Бендер поген. Тудын верч йӱклаш йодмо постышто калык лӱддымӧ врач нерген шуко поро да тауштымо мутым возен.
М.ИВАНОВА

 
Опубликовать в Одноклассники

Добавить комментарий