Йошкар-Оласе медицине колледжыште психологий дисциплиным туныктышо Е.Виногорова «Тазалыкын туныктышыжо – 2019» X всероссийский конкурсышто «Образованийыште инноваций» номинацийыште сеҥышыш лектын.
Конкурс «Тазалыкым аралыме шинчымаш: опыт, проблеме, вияҥме ончыкылык йӧн-влак» всероссийский форум кышкарыште Челябинскыште эртен. Российын 44 регионжо гыч толшо школлаште, кокла профессиональный шинчымашым пуымо тӧнежлаште, ешартыш шинчымашым пуымо организацийлаште туныктышо тренер ден педагог-влак паша опытышт дене презентаций гоч палдареныт, почмо урокым, класс деч ӧрдыжсӧ мероприятийым эртареныт.
Елена Альбертовна медицине колледжыште 15 ий пашам ышта. Ончычшо студент-влак дене класс деч ӧрдыжсӧ пашам вӱден, вара кокымшо ешартыш шинчымашым налын да психологий предметым туныкташ тӱҥалын.
Е.Виногорова колледжыште ынде икмыняр ий «Антистресс» школым вӱда, тренинг, деловой модмаш-шамычым, нойымыштым луштараш, кумылым нӧлташ да шкем физический формышто кучаш полшышо куштымаш терапий занятийым эртара .
Елена Альбертовна куштымаш терапий нерген презентацийжым марий национальный куштымаш негызеш ямдылен да конкурсышто коллегыже да жюри велым кӱкшӧ ак дене палемдалтын. Челябинск оласе ик гимназийыште эртарыме урокшат чылалан келшен.
– Тиде конкурс шке мастарлыкым ончыктымо деч посна эше моло регион гыч толшо преподаватель-влак дене палыме лияш, нунын деч шуко сайлан тунемаш йӧным ыштыш, – манеш Елена Альбертовна.
М.ИВАНОВА
